തിരുവനന്തപുരം: നെയ്യാര്‍ സഫാരി പാര്‍ക്കില്‍ നിന്നും രക്ഷപെട്ട കടുവയെ കണ്ടെത്തി. എന്നാല്‍ ഇതുവരെ പിടികൂടാന്‍ സാധിച്ചിട്ടില്ല. കടുവയെ രാവിലെ സഫാരി പാര്‍ക്കില്‍ കണ്ടെന്ന് ഫോറസ്റ്റ് കണ്‍സര്‍വേറ്റര്‍ പറഞ്ഞു. നെയ്യാറില്‍ കടുവയുള്ള സ്ഥലം അധികൃതര്‍ തിരിച്ചറിഞ്ഞിട്ടുണ്ട്. ഉടന്‍ മയക്കുവെടി വച്ചേക്കുമെന്നാണ് വിവരം.

അതേസമയം വയനാട്ടില്‍ നിന്ന് മയക്കുവെടി വിദഗ്ധന്‍ ഡോ. അരുണ്‍ സക്കറിയ നെയ്യാര്‍ ഡാമിലെത്തി. കടുവയുടെ ആരോഗ്യ സ്ഥിതി കൂടെ കണക്കിലെടുത്തായിരിക്കും മയക്കുവെടി വയ്ക്കുക. കടുവ നിരീക്ഷണ പരിധിയിലെന്നും ജനങ്ങള്‍ ആശങ്ക പെടേണ്ടെതില്ലെന്നും അധികൃതര്‍ വ്യക്തമാക്കി.

വയനാട്ടില്‍ നിന്നെത്തിച്ച 10 വയസുള്ള കടുവ ഇന്നലെ ഉച്ചയോടാണ് കൂട്ടില്‍ നിന്നും രക്ഷപ്പെട്ടത്. ചികിത്സയ്ക്കായി പ്രത്യേകം ക്രമീകരിച്ച കൂടിന്റെ കമ്പി വളച്ചു രക്ഷപെട്ടുവെന്നാണ് വനം വകുപ്പിന്റെ പ്രാഥമിക നിഗമനം.