മംഗലപുരം: കാരമൂട് ഗവ.എല്‍.എസിനടുത്ത് വൈദ്യുതി ലൈനില്‍ ഉരസിയ വൈക്കോല്‍ലോറി കത്തിനശിച്ചു. തമിഴ്‌നാട് സ്വാദേശികളായ ഡ്രൈവറും ക്ലീനറും അത്ഭുതകരമായി രക്ഷപ്പെട്ടു. ഇന്നലെ രാവിലെ ഒന്‍പതോടെ പോത്തന്‍കോട് മംഗലപുരം റോഡിലാണ് സംഭവം.
നല്ല പൊക്കത്തില്‍ വൈക്കോല്‍ കയറ്റി വന്ന ലോറി താഴ്ന്നുകിടന്ന വൈദ്യുതി ലൈനില്‍ തട്ടി തീപിടിക്കുകയായിരുന്നു. ഇത് ആദ്യം ഡ്രൈവര്‍ അറിഞ്ഞില്ലായിരുന്നു. അതുവഴിപോയവരാണ് ലോറിയില്‍ നിന്നും തീയും പുകയും ഉയരുന്നത് കണ്ടത്. സംഭവത്തെ തുടര്‍ന്ന് രണ്ട് മണിക്കൂറോളം കാരമൂട് പോത്തന്‍കോട് റോഡില്‍ ഗതാഗതതടസവുണ്ടായി.
കഴക്കൂട്ടം, ആറ്റിങ്ങല്‍ ഫയര്‍ഫോഴ്‌സില്‍ നിന്ന് നാല് യൂനിറ്റുകള്‍ ഒരുമണിക്കൂറോളം നാട്ടുകാരുടെ സഹായത്തോടെയാണ് തീകെടുത്താനായത്. കഴക്കൂട്ടം ഫയര്‍‌സ്റ്റേഷനിലെ സ്റ്റേഷന്‍ ഓഫിസര്‍ കെ.പി മധു, ഫയര്‍മാന്‍മാരായ നിഷാദ്, ദിനേശ്, അരുണ്‍, ഷാംജികുമാര്‍, അനില്‍കുമാര്‍, രാജേഷ്, സനല്‍ തുടങ്ങിയവരുടെ നേതൃത്വത്തിലായിരുന്നു തീകെടുത്തിയത്.