കോഴിക്കോട്: 'ഖുര്‍ ആന്‍ സുകൃതത്തിന്റെ വചനപ്പൊരുള്‍' എന്ന പ്രമേയവുമായി എസ്.കെ.എസ്.എസ്.എഫ് സംസ്ഥാന വ്യാപകമായി സംഘടിപ്പിക്കുന്ന റമദാന്‍ കാംപയിന്‍ പരിപാടികള്‍ക്കുള്ള ഒരുക്കങ്ങള്‍ പൂര്‍ത്തിയാവുന്നു. സംസ്ഥാന തല ഉദ്ഘാടനം 18 ന് വ്യാഴാഴ്ച ഉച്ചക്ക് 3 മണിക്ക് കോഴിക്കോട് കെ.പി കേശവമേനോന്‍ ഹാളില്‍ ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റി വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി നിര്‍വഹിക്കും.
പരിപാടിയില്‍ മുന്‍ ഡി.ജി.പി അലക്‌സാണ്ടര്‍ ജേക്കബ് മുഖ്യാതിഥിയായിരിക്കും. പ്രമുഖ പണ്ഡിതരും സാംസ്‌കാരിക രംഗത്തെ പ്രമുഖരും സംബന്ധിക്കും.
കാംപയിനിന്റെ ഭാഗമായി സംസ്ഥാന തലത്തില്‍ സംഘടിപ്പിക്കുന്ന ഖുര്‍ ആന്‍ മെഗാ ക്വിസിനുള്ള രജിസ്‌ട്രേഷന്‍ ആരംഭിച്ചു. മൂന്ന് റൗണ്ടുകളിലായുള്ള മത്സരത്തില്‍ ഒന്നാം സ്ഥാനം ലഭിക്കുന്ന വിജയിക്ക് സൗജന്യമായി ഉംറ യാത്രക്കാണ് സംഘടന അവസരമൊരുക്കുന്നത്. ജില്ലാ, മേഖലാ, ക്ലസ്റ്റര്‍ തലങ്ങളില്‍ സകാത്ത് സെമിനാറുകള്‍, തര്‍ബ്ബിയത്ത് ക്യാംപുകള്‍, ഇഫ്താര്‍ മീറ്റുകള്‍ തുടങ്ങിയവ നടക്കും. ശാഖാ തലങ്ങളില്‍ ഖുര്‍ ആന്‍ പാരായണ പരിശീലന ക്യാംപുകള്‍ സംഘടിപ്പിക്കും. ഇതിനാവശ്യമായ പഠന സഹായി രജിസ്റ്റര്‍ ചെയ്യുന്ന യൂനിറ്റുകള്‍ക്ക് സംസ്ഥാന കമ്മിറ്റി നല്‍കും. യൂനിറ്റ് തലങ്ങളില്‍ ബദ്‌റ് ദിനത്തിലും മറ്റും പ്രത്യേക പ്രാര്‍ഥനാ സദസുകള്‍ സംഘടിപ്പിക്കും.
സംഘടനയുടെ ആതുര സേവന വിഭാഗമായ സഹചാരിയുടെ ഫണ്ട് ശേഖരണം റമദാന്‍ ആദ്യ വെള്ളിയാഴ്ചയായ ജൂണ്‍ രണ്ടിന് സംസ്ഥാനത്തെ എല്ലാ പള്ളികളിലും നടക്കും. റോഡപകടങ്ങളില്‍ പരുക്ക് പറ്റി ചികിത്സയില്‍ കഴിയുന്നവര്‍ക്കും, കാന്‍സര്‍, വൃക്കരോഗികള്‍ക്കും, സ്ഥിരമായി മരുന്ന് കഴിക്കുന്നവരുമായ നിര്‍ധന രോഗികള്‍ക്കുമാണ് ധന സഹായം നല്‍കുന്നത്. സഹചാരിയുടെ അപേക്ഷാ ഫോറം ംംം.സെളൈ.ശി എന്ന വെബ് സൈറ്റില്‍ ലഭിക്കും.