ന്യൂഡല്‍ഹി: തെരഞ്ഞെടുപ്പ് നയതന്ത്രജ്ഞന്‍ പ്രശാന്ത് കിഷോര്‍ ഇപ്രാവശ്യം ജെ.ഡി.യുവിനൊപ്പം പ്രവര്‍ത്തിക്കും. 2014 ല്‍ മോദിയുടെ വിജയത്തിലേക്കും പിന്നീട് ബിഹാറില്‍ നിതീഷ് കുമാറിന്റെ വിജയത്തിലേക്കും തന്ത്രങ്ങള്‍ മെനഞ്ഞയാളാണ് പ്രശാന്ത് കിഷോര്‍.

ഇന്ത്യന്‍ പൊളിറ്റിക്കന്‍ ആക്ഷന്‍ കമ്മിറ്റി (ഐ-പാക്) എന്ന അദ്ദേഹത്തിന്റെ കമ്പനി ജെ.ഡി.യുവിനൊപ്പം ചേര്‍ന്നു പ്രവര്‍ത്തിക്കും. തന്റെ പുതിയ യാത്ര ബിഹാറില്‍ നിന്നാണെന്ന് പ്രശാന്ത് കിഷോര്‍ ട്വീറ്റ് ചെയ്തു.

2014 ല്‍ മോദിക്കൊപ്പമായിരുന്നെങ്കില്‍ 2015 ല്‍ ബിഹാറില്‍ നടന്ന തെരഞ്ഞെടുപ്പില്‍ ബി.ജെ.പിക്കെതിരെ മഹാസഖ്യ രൂപീകരണത്തിന് പ്രശാന്ത് കിഷോര്‍ തന്ത്രം മെനഞ്ഞു. നിതീഷ് കുമാറിന്റെ ജെ.ഡി.യു, ലാലു പ്രസാദ് യാദവിന്റെ ആര്‍.ജെ.ഡി, കോണ്‍ഗ്രസ് തുടങ്ങി വിശാല സഖ്യമുണ്ടാക്കി ബിഹാറില്‍ നിന്ന് ബി.ജെ.പിയെ അകറ്റാനായി. എന്നാല്‍ പിന്നീട് ജെ.ഡി.യു കാലുമാറി ബി.ജെ.പിക്കൊപ്പം ചേര്‍ന്നു.

കഴിഞ്ഞ രണ്ടുവര്‍ഷമായി ഐ-പാക് വൈ.എസ്.ആര്‍ കോണ്‍ഗ്രസ് പാര്‍ട്ടിയുടെ വൈ.എസ് ജഗ്മോഹന്‍ റെഡ്ഡിക്കു വേണ്ടിയാണ് പ്രവര്‍ത്തിച്ചിരുന്നത്.

2019 തെരഞ്ഞെടുപ്പില്‍ നിതീഷ് കുമാറിന് 'കിങ് മേക്കര്‍' ആവാനുള്ള നീക്കമാണിതെന്നാണ് രാഷ്ട്രീയ നിരീക്ഷകര്‍ കാണുന്നത്. ആര്‍ക്കും ഭൂരിപക്ഷമില്ലാത്ത സഭയുണ്ടായാല്‍ ശക്തരായ വിലപേശലിന്റെ പാര്‍ട്ടിയാവാനാണ് ഒരുക്കം.