വേങ്ങര: ക്യാംപസ് വിപുലീകരണത്തെ തുടര്‍ന്ന് ഗവ. മോഡല്‍ വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ ഫിറ്റ്‌നസ് ഇല്ലാത്ത കെട്ടിടങ്ങള്‍ പൊളിച്ചു മാറ്റി. ജീര്‍ണിച്ച ആറ് കെട്ടിടങ്ങളാണ് ഇടുങ്ങിയ കാംപസില്‍നിന്ന് പൊളിച്ചു മാറ്റിയത്. 1957 മുതല്‍ വിവിധ കാലങ്ങളില്‍ നിര്‍മിച്ച ഓട് മേഞ്ഞതും കോണ്‍ക്രീറ്റില്‍ പണിതതുമായ കെട്ടിടങ്ങളാണ് നീക്കംചെയ്തത്. അങ്ങാടിയോട് ചേര്‍ന്ന് 87 സെന്റില്‍ വിവിധ നിലകളിലായി ഇരുപതിലധികം കെട്ടിടങ്ങള്‍ ഇവിടെ ഉണ്ടായിരുന്നു. ഇത് മൂലം കുട്ടികള്‍ക്ക് ക്യാംപസിലിറങ്ങി നടക്കാനോ മുറികളില്‍ യഥേഷ്ടം കാറ്റും വെളിച്ചവും ലഭിക്കാനോ കഴിയാത്ത സാഹചര്യം നിലനിന്നിരുന്നു.
കഴിഞ്ഞ അധ്യയന വര്‍ഷം മുതല്‍ വിഎച്ച്‌സി, ഹയര്‍ സെക്കന്‍ഡറി വിഭാഗം പൂര്‍ണമായും ചാത്തംകുളത്തേയ്ക്ക് മാറ്റിയതും സ്ഥലപരിമിതി മൂലം വീര്‍പ്പുമുട്ടിയിരുന്ന ഈ വിദ്യാലയത്തിന് അനുഗ്രഹമായി. എല്‍.പി വിഭാഗം മുതല്‍ ഹയര്‍ സെക്കന്‍ഡറി വരെ നിലവില്‍ 1200 വിദ്യാര്‍ഥികളുണ്ട്. പൊളിച്ചുമാറ്റപ്പെട്ടിടത്ത് മൂന്ന് നിലകളിലായി പുതിയ കെട്ടിടമുണ്ടാക്കി ബാക്കി ഭാഗത്ത് ടെന്നീസ്, വോളിബോള്‍ കോര്‍ട്ടുകളും ടൈല്‍ പാകിയ വിശാല ഗ്രൗണ്ടും നിര്‍മിക്കാനാണ് പി.ടി.എ ലക്ഷ്യം വയ്ക്കുന്നത്.