റിയാദ്: റിയാദിലെ സാമൂഹ്യ, സാംസ്കാരിക, വിദ്യാഭ്യാസ മേഖലകളിലെ സജീവ സാന്നിധ്യമായ റിയാദ് കെ.എം.സി.സി സെൻട്രൽ കമ്മിറ്റി ആക്ടിംഗ് സെക്രട്ടറി സുബൈർ അരിമ്പ്ര മുന്ന് പതിറ്റാണ്ടിലധികം നീണ്ട പ്രവാസ ജീവിതത്തിന്‌ വിരാമമിടുന്നു. 1989 ൽ റിയാദിലെ ബാ അബ്ദുറഹീം അൽ അമൂദി കമ്പനിയിലേക്ക് സെയിൽസ്മാൻ തസ്തികയിൽ ജോലിക്കെത്തിയ സുബൈർ നീണ്ട 27 വർഷത്തെ സ്തുത്യർഹമായ സേവനത്തിന്‌ ശേഷമാണ്‌ പ്രസ്തുത കമ്പനിയിൽ നിന്നും കീ അക്കൗണ്ട്സ് ഇൻ ചാർജ്ജ് (സെയിൽസ്) ആയി പ്രവാസത്തിന്‌ അന്ത്യം കുറിക്കുന്നത്.

വിവിധ തലങ്ങളിൽ സജീവമായ ഇടപ്പെടൽ നടത്തിയിരുന്ന സുബൈർ അരിമ്പ്ര 32 വർഷമായി പ്രവാസിയാണ്‌.  അഞ്ച് വർഷം ഖത്തറിൽ ജോലി നോക്കിയ ശേഷമാണ്‌ കമ്പനി വിസയിൽ റിയാദിലെത്തുന്നത്. രണ്ട് ഘട്ടത്തിലായി റിയാദ് കെ.എം.സി.സി സെൻട്രൽ കമ്മിറ്റിയുടെ വൈസ് പ്രസിഡണ്ട്, സെക്രട്ടറി എന്നീ നിലകളിലും മലപ്പുറം ജില്ലാ കെ.എം.സി.സി ജനറൽ സെക്രട്ടറി,  തിരൂരങ്ങാടി മണ്ഡലം പ്രസിഡണ്ട് കൂടാതെ സി.എച്ച് സ്മാരക വേദി, സഹ്യ കലാ വേദി, മാപ്പിള കലാ അക്കാഡമി, നിള കുടുംബ വേദി, തിരൂരങ്ങാടി പി.എസ്.എം.ഒ അലൂംനി തുടങ്ങിയ സംഘടനകളുടെയും ഭാരവാഹിയായി പ്രവർത്തിച്ചിട്ടുണ്ട്. സെൻട്രൽ കമ്മിറ്റി രണ്ട് തവണയായി സംഘടിപ്പിച്ച സ്കൂൾ ഫെസ്റ്റിന്റെ മുഖ്യ സംഘാടകരിലൊരാളായ സുബൈർ റിയാദിലെ കെ.എം.സി.സി വേദികളിലെ ‘ക്വിസ് മാസ്റ്ററാ’യിരുന്നു.

21 വർഷമായി കുടുംബമൊത്ത് റിയാദിൽ കഴിയുന്ന സുബൈറിന്റെ മക്കൾ ഇരുവരും റിയാദിൽ സുപരിചിതരാണ്‌. നിലവിൽ പാരീസിൽ യു.എന്നിന്റെ കീഴിലുള്ള യുണൈറ്റഡ് നാഷണൽ ഇന്റസ്ട്രിയൽ ഡെവലപ്പ്മെന്റ് ഓർഗനൈസേഷൻ (യുണിഡോ)നിലെ ഉദ്യോഗസ്ഥനായ മുഹമ്മദ് അമീൻ സ്കൂൾ തലത്തിൽ സഊദിയിലും മിഡിലീസ്റ്റിലും നടന്ന ക്വിസ് മത്സരങ്ങളിൽ പങ്കെടുത്ത് ഒന്നാം സ്ഥാനം നേടിയിട്ടുണ്ട്.  രണ്ടാമത്തെ മകൻ ഏഴ് വയസ്സുകാരനായ മുഹമ്മദ് റാസിയും ഇതേ രീതിയിൽ റിയാദിലെ വിവിധ വേദികളിൽ നിറഞ്ഞു നിൽക്കുകയും അംഗീകാരങ്ങൾ നേടുകയും ചെയ്തിട്ടുണ്ട്.  ലോക രാജ്യങ്ങളുടെ പേരും തൽസ്ഥാനവും ഹൃദിസ്ഥമാക്കിയ റാസി വിവിധ വേദികളിൽ സദസ്സിന്റെ ചോദ്യങ്ങൾക്ക് കൃത്യമായ ഉത്തരം നൽകി ശ്രദ്ധേയനായിട്ടുണ്ട്.  മാസങ്ങൾ പ്രായമായ മുഹമ്മദ് ഹമ്മാദും മറ്റൊരു മകനാണ്‌. ഭാര്യ: റസിയ.  മലപ്പുറം ജില്ലാ പഞ്ചായത്ത് മുൻ പ്രസിഡണ്ടും മുസ്ലീം ലീഗ് നേതാവുമായ അരിമ്പ്ര മുഹമ്മദ് മാസ്റ്ററുടെയും സൈനബ തയ്യിലിന്റെയും മകനാണ്‌.  സുബൈറിന്റെ സഹോദരങ്ങളും റിയാദിലുണ്ട്.