എടപ്പാള്‍: ഉടമയെ പറ്റിച്ച് ബൈക്കുമായി കറങ്ങിയ വിദ്യാര്‍ഥിയെ നാട്ടുകാര്‍ പിടികൂടി. ഇന്നലെ വൈകീട്ട് എടപ്പാള്‍ പഴയ ബ്ലോക്കിന് സമീപം ബൈക്കില്‍ എണ്ണ തീര്‍ന്നതിനാല്‍ എണ്ണ വാങ്ങാന്‍ ബൈക്ക് കടം ചോദിച്ചെത്തിയതോടെയാണ് സംഭവത്തിന് തുടക്കം.
റോഡരികില്‍ നിര്‍ത്തിയിട്ട ബൈക്ക് സ്വന്തം ബൈക്കാണെന്ന് പറഞ്ഞാണ് വിദ്യാര്‍ഥി ബൈക്ക് കടം വാങ്ങിയത്. എന്നാല്‍ അല്‍പസമയം കഴിഞ്ഞ് വിദ്യാര്‍ഥി കാണിച്ച ബൈക്ക് യഥാര്‍ത്ഥ ഉടമ എടുക്കാനെത്തിയതോടെയാണ് വിദ്യാര്‍ഥി ബൈക്കുമായി കടന്നതാണെന്ന് ബോധ്യമായത്. ഇതോടെ നാട്ടുകാര്‍ ബൈക്ക് അന്വേഷിച്ചിറങ്ങി. തുടര്‍ന്ന് നടത്തിയ തെരച്ചിലില്‍ ബൈക്കില്‍ കറങ്ങിയ വിദ്യാര്‍ഥിയെ എടപ്പാളില്‍ വച്ച് പിടികൂടുകയായിരുന്നു. ചോദ്യം ചെയ്യലില്‍ എടപ്പാള്‍ ഹയര്‍സെക്കന്‍ഡറി സ്‌കൂളില്‍ പ്ലസ്ടുവിന് പഠിക്കുന്ന കോട്ടത്തറ സ്വദേശിയാണെന്ന് ബോധ്യപ്പെട്ടു.