കൊല്ലം: ആശ്രാമം ഇ.എസ്.ഐ ആശുപത്രിയില്‍ വൈദ്യുതി മുടങ്ങിയതിനെ തുടര്‍ന്നു രോഗികളുടെ ശസ്ത്രക്രിയ അവസാന നിമിഷം മാറ്റിവെച്ചു.രോഗികളില്‍ പലരെയും  ഓപ്പറേഷന്‍ തിയേറ്ററിലെത്തിച്ച് അനസ്‌തേഷ്യയും നല്‍കിയതിനു ശേഷമാണ് ശസ്ത്രക്രിയ മാറ്റിവെച്ചതായി അധികൃതര്‍ അറിയിച്ചത്.
വൈദ്യുതി മുടങ്ങിയതോടെ തിയേറ്ററിലെ എ.സിയുടെയും പ്രവര്‍ത്തനം നിലച്ചു. ഇതാണ് ശസ്ത്രക്രിയ മാറ്റാന്‍ കാരണമെന്നാണ് അധികൃതര്‍ പറയുന്നത്. ശസ്ത്രക്രിയയ്ക്കു മുന്‍പു കുത്തിവയ്പ്പു എടുക്കേണ്ടിവന്ന രോഗികളില്‍ പലരുടെയും ആരോഗ്യനില മോശമായത് ബന്ധുക്കളെ ആശങ്കയിലാക്കി. ശസ്ത്രക്രിയക്കായി ഒരുങ്ങിയ വയോധികരില്‍ പലര്‍ക്കും തളര്‍ച്ച അനുഭപ്പെട്ടതായും  പരാതി ഉയര്‍ന്നു. അതേ സമയം ഇവിടെ ശസ്ത്രക്രിയകള്‍ അവസാന നിമിഷം മാറ്റിവയ്ക്കുന്നത് പതിവാണെന്ന്  രോഗികള്‍ പറയുന്നു.  സംഭവം വ്യാപക പ്രതിഷേധത്തിനിടയാക്കിയിട്ടുണ്ട്. യുവജന സംഘടനകള്‍ പ്രതിഷേധത്തിനൊരുങ്ങുകയാണ്.