ജിദ്ദ: യാത്രക്കാരെ ദുരതത്തിലാക്കി എയര്‍ ഇന്ത്യ. റിയാദില്‍ നിന്നും കൊച്ചിയിലേക്കും മുംബൈയിലേക്കുമുള്ള എയര്‍ ഇന്ത്യ എഐ 924
വിമാനം ഒന്നര ദിവസം വൈകിയാണ് പുറപ്പെട്ടത്. അതേ സമയം ഇതു മടങ്ങിയെത്തിയ ശേഷം നടത്തേണ്ട മുംബൈ സര്‍വീസും വൈകുകയാണ്. കനത്ത ചൂട് കാരണം വിമാനത്തിന് സാങ്കേതിക തകരാറുണ്ടായതാണ് സര്‍വീസ് വൈകിച്ചത്.

ഞായറാഴ്ച 3.45ന് പുറപ്പെടേണ്ടതായിരുന്നു കൊച്ചി വിമാനം. പുറപ്പെട്ടത് പക്ഷേ തിങ്കളാഴ്ച അര്‍ധ രാത്രിയോടെ. കുഞ്ഞുങ്ങളും സ്ത്രീകളുമടക്കം 152ഓളം പേര്‍ ദുരിതമനുഭവിച്ചത് ഒന്നര ദിനം.

രാത്രി ഒരു മണിയോടെ വിമാനത്താവളത്തിലെത്തിയവര്‍ക്ക് ബോര്‍ഡിംഗ് പാസ് വിതരണം ചെയ്തിരുന്നു. യാത്രക്കാരെ വിമാനത്തില്‍ കയറ്റിയെങ്കിലും പുലര്‍ച്ചെ 3.30ന് ഷെഡ്യൂള്‍ ചെയ്ത വിമാനം പുറപ്പെട്ടില്ല. മണിക്കൂറുകള്‍ വിമാനത്തിലിരുന്ന യാത്രക്കാര്‍ ബഹളം വെച്ചതോടെ രാവിലെ 7.30ന് പുറപ്പെടുമെന്ന് അറിയിച്ചു. എന്നാല്‍ നിരാശയായിരുന്നു ഫലം. ഇവരെ പിന്നീട് ഹോട്ടലിലേക്ക് മാറ്റുകയായിരുന്നു. യാത്ര മുടങ്ങിയതിനാല്‍ ഒരു വിദ്യാര്‍ഥിക്ക് കഴിഞ്ഞ ദിവസം നടന്ന കേരള യൂനിവേഴ്‌സിറ്റിയുടെ ബികോം പരീക്ഷ എഴുതാന്‍ കഴിഞ്ഞില്ല. മറ്റൊരാള്‍ക്ക് ബന്ധുവിന്റെ ശവസംസ്‌കാര ചടങ്ങില്‍ പങ്കെടുക്കാന്‍ കഴിയാത്ത അവസ്ഥയുമുണ്ടായി.

അതേ സമയം കൊച്ചി വിമാനം മടങ്ങിയെത്തിയ ശേഷം തിങ്കളാഴ്ച രാവിലെ 6.45ന് പുറപ്പെടേണ്ടതായിരുന്നു മുംബൈ വിമാനം. ഇതിലുമുണ്ട് ഇരുന്നൂറോളം യാത്രക്കാര്‍. എല്ലവരേയും ഹോട്ടലിലേക്ക് മാറ്റി.

കനത്ത ചൂടിനെ തുടര്‍ന്ന് വിമാനത്തിന് സാങ്കേതിക തകരാറുണ്ടായി. വിമാനം തണുപ്പിക്കാന്‍ മുംബൈയില്‍ നിന്ന് സാങ്കേതിക ജീവനക്കാരെത്തിയ ശേഷമാണ് സര്‍വീസ് ആരംഭിച്ചത്. റിയാദില്‍ നിന്ന് എയര്‍ ഇന്ത്യ ഫ്‌ലൈറ്റുകള്‍ ഒന്നിച്ച് വൈകുന്നതും ഏറെക്കാലത്തിന് ശേഷമാണ്.