അഹമ്മദാബാദ്: വിമാനറാഞ്ചല്‍ നിരോധന നിയമപ്രകാരം വ്യവസായിക്ക് ജീവപര്യന്തം തടവും അഞ്ച് കോടി രൂപ പിഴയും വിധിച്ച് കോടതി. എന്‍.ഐ.എ പ്രത്യേക കോടതിയാണ് 2016ല്‍ നിലവില്‍ വന്ന നിയമപ്രകാരമുള്ള കേസില്‍ ശ്രദ്ധേയമായ വിധി പ്രസ്താവിച്ചത്. മുംബൈയിലെ വ്യവസായിയായ ബിര്‍ജു കിഷോര്‍ സല്ലയാണ് വ്യാജ വിമാനറാഞ്ചല്‍ ഭീഷണിക്ക് പുറകിലെ കഥാപാത്രം. 2017ലാണ് സംഭവം നടന്നത്.
ഡല്‍ഹി-മുംബൈ ജെറ്റ് എയര്‍വേയ്‌സില്‍ ഇയാള്‍ ഒരു കുറിപ്പ് എഴുതിവയ്ക്കുകയായിരുന്നു. ജെറ്റ് എയര്‍വേസിന്റെ തന്നെ 9ഡബ്ല്യു നംബറിലുള്ള വിമാനത്തില്‍ റാഞ്ചാനായി ആളുകളുണ്ടെന്നും വിമാനം പാക് അധീന കശ്മീരില്‍ ഇറക്കണമെന്നും അല്ലെങ്കില്‍ വിമാനത്തിലുള്ള 12 പേരും മരിക്കുമെന്നാണ് കുറിപ്പിലുണ്ടായിരുന്നത്. ഉറുദുവിലാണ് കുറിപ്പ് തയാറാക്കിയിരുന്നത്. ഗൂഗിള്‍ പരിഭാഷാ സാഹായി ഉപയോഗിച്ചാണ് ഇംഗ്ലീഷ് വാക്കുകള്‍ ഉറുദുവിലേക്ക് മാറ്റിയതെന്ന് എന്‍.ഐ.എ കുറ്റപത്രത്തില്‍ വ്യക്തമാക്കിയിട്ടുണ്ട്. കുറിപ്പ് കണ്ടെത്തിയതിനെ തുടര്‍ന്ന് വിമാനം അഹമ്മദാബാദില്‍ അടിയന്തരമായി ഇറക്കിയിരുന്നു. 2017 ജനുവരിയിലാണ് ദേശീയ അന്വേഷണ ഏജന്‍സി കേസിലെ കുറ്റപത്രം സമര്‍പിച്ചത്.
കോടതി വിധി പ്രകാരം അഞ്ച് കോടി രൂപ പിഴയില്‍ ഒരു ലക്ഷം രൂപ വീതം വിമാനത്തിലെ പൈലറ്റിനും സഹപൈലറ്റിനും നല്‍കണം. 50000 രൂപ വീതം രണ്ട് എയര്‍ഹോസ്റ്റസുമാര്‍ക്കും 25000 രൂപ വീതം ക്ര്യൂ മെംബേഴ്‌സിനും നല്‍കണമെന്നും വിധിയില്‍ പറയുന്നു. 115 യാത്രക്കാരാണ് ആ വിമാനത്തില്‍ ഉണ്ടായിരുന്നത്. വിമാന റാഞ്ചല്‍ നിരോധന നിയമപ്രകാരം ഒരു വ്യക്തിക്കെതിരേയുണ്ടായ ആദ്യ വിധിയാണിത്.