കണ്ണൂര്‍: കണ്ണൂര്‍ സിറ്റി ആയിക്കരയില്‍ മധ്യവയസ്‌കനെ തലയ്ക്കടിച്ചു കൊന്നു. ജില്ലാ ആശുപത്രിക്ക് സമീപമുള്ള ആയിക്കര മഹാഗണപതി ക്ഷേത്രത്തിനു മുന്നിലെ ഹോട്ടലിനു സമീപമാണ് സംഭവം. ഇരിട്ടി സ്വദേശി ചാക്കോ എന്ന നീഗ്രോ രാജന്‍ (59) ആണ് മരിച്ചത്.
തലയില്‍ കോണ്‍ക്രീറ്റ് കട്ടകൊണ്ട് ഇടിച്ചാണ് കൊല നടത്തിയത്. തുടര്‍ന്ന് അടുത്തുണ്ടായിരുന്ന വിറകും പഴയ ചാക്കും ഉപയോഗിച്ച് മൃതദേഹം ആരും കാണാത്ത വിധത്തില്‍ മൂടിവച്ചു പ്രതി സ്ഥലം വിടുകയായിരുന്നു. ശനിയാഴ്ച അര്‍ധരാത്രിയോ ഇന്നലെ പുലര്‍ച്ചെയോ ആണ് കൊല നടന്നതെന്ന് പൊലിസ് പറഞ്ഞു. സമീപവാസി പൊലിസില്‍ അറിയിച്ചതിനെ തുടര്‍ന്നാണ് കൊലപാതകം പുറംലോകമറിഞ്ഞത്. സംഭവത്തില്‍ ഇരിട്ടി സ്വദേശി ജോസിനെ (39) സിറ്റി പൊലിസ് അറസ്റ്റ് ചെയ്തു.
കൊല്ലാനുപയോഗിച്ച കോണ്‍ക്രീറ്റ് കട്ട പൊലിസ് കണ്ടെത്തി. വര്‍ഷങ്ങള്‍ക്കു മുന്‍പ് ആയിക്കരയിലെത്തിയ രാജന്‍ അവിടെ ഹാര്‍ബറില്‍ ജോലി ചെയ്തു വരികയായിരുന്നു. സിറ്റി സി.ഐ പി.ആര്‍ സതീശന്‍, എസ്.ഐ പി.കെ സുമേഷ് എന്നിവരുടെ നേതൃത്വത്തില്‍ സംഭവ സ്ഥലത്തു വച്ചു തന്നെ ഇന്‍ക്വസ്റ്റ് നടത്തി. മൃതദേഹം പോസ്റ്റ്‌മോര്‍ട്ടത്തിനായി പരിയാരം മെഡിക്കല്‍ കോളജ് ആശുപത്രിയിലേക്ക് മാറ്റി.