മാഡ്രിഡ്: കളിമണ്‍ പ്രതലത്തിലെ സീസണിലെ മിന്നും ഫോം സ്പാനിഷ് ടെന്നീസ് താരം റാഫേല്‍ നദാല്‍ തുടരുന്നു. തുടര്‍ച്ചയായ 15ാം ക്ലേ കോര്‍ട്ട് വിജയത്തോടെ നദാല്‍ അഞ്ചാം തവണയും മാഡ്രിഡ് മാസ്റ്റേഴ്‌സ് ടെന്നീസ് കിരീടം സ്വന്തമാക്കി. ഫൈനലില്‍ ഓസ്ട്രിയന്‍ താരം ഡൊമിനിക്ക് തീമിനെ പരാജയപ്പെടുത്തിയാണ് നദാല്‍ കിരീടം സ്വന്തമാക്കിയത്. കടുത്ത വെല്ലുവിളിയുമായി ഓസ്ട്രിയന്‍ താരം നിറഞ്ഞെങ്കിലും കളിമണ്‍ കോര്‍ട്ടിലെ തന്റെ മികവിന്റെ പുറത്താണ് നദാലിന്റെ വിജയം. സ്‌കോര്‍: 7-6 (10-8), 6-4.
അടുത്ത മാസം തുടങ്ങാനിരിക്കുന്ന ഫ്രഞ്ച് ഓപണ്‍ ടെന്നീസിന് മുന്നോടിയായുള്ള വിജയം നദാലിന് കരുത്താകും. ചാംപ്യന്‍ പട്ടം സ്വന്തമാക്കിയതോടെ സ്വിസ് ഇതിഹാസം റോജര്‍ ഫെഡററെ പിന്തള്ളി റാങ്കിങില്‍ നാലാം സ്ഥാനത്തേക്കുയര്‍ന്ന നദാല്‍ എ.ടി.പി വേള്‍ഡ് ടൂര്‍ മാസ്റ്റേഴ്‌സില്‍ 30 കിരീടങ്ങളെന്ന ലോക രണ്ടാം നമ്പര്‍ താരം നൊവാക് ദ്യോക്കോവിചിന്റെ റെക്കോര്‍ഡിനൊപ്പവും എത്തി.