തേഞ്ഞിപ്പലം: പള്ളി മതിലിന്റെ മറവില്‍ പള്ളിക്കല്‍ബസാര്‍ ടൗണിലെ ചില കൈയേറ്റക്കാര്‍ക്ക് വേണ്ടി പഞ്ചായത്തിനെതിരേ കാന്തപുരം വിഭാഗം നല്‍കിയ സ്റ്റേ കോടതി ചെലവു സഹിതം തള്ളി.
പള്ളിക്കല്‍ബസാര്‍ ടൗണ്‍ നവീകരണത്തിനായി എം.എല്‍.എ ആസ്തിവികസന ഫണ്ടില്‍ നിന്നു അനുവദിച്ച 25 ലക്ഷം രൂപയുടെ പ്രവൃത്തിയായ ഡ്രൈനേജ് കം ഫൂട്ട്പാത്ത് പദ്ധതി നടപ്പാക്കുന്നതിന്റെ മുന്നോടിയായി റവന്യൂ വിഭാഗം നടത്തിയ സര്‍വേ റിപ്പോര്‍ട്ട് പ്രകാരം കൈയേറ്റങ്ങള്‍ ഒഴിപ്പിക്കാന്‍ പള്ളിക്കല്‍ ഗ്രാമ പഞ്ചായത്ത് നടപടികള്‍ സ്വീകരിച്ചിരുന്നു.
എന്നാല്‍ പള്ളികമ്മിറ്റി പ്രസിഡന്റ് എന്ന പേരില്‍ സി.കെ അബ്ദുല്‍മജീദ് എന്നയാള്‍ ഹൈക്കോടതിയെ സമീപിച്ച് കൈയേറ്റത്തില്‍ ഉള്‍പ്പെട്ട ചിലര്‍ക്ക് വേണ്ടി സ്റ്റേ നേടിയിരുന്നു. ഇതിനെതിരേ പള്ളിക്കല്‍ ഗ്രാമ പഞ്ചായത്ത് കോടതിയെ സമീപിക്കുകയും പൊതുജനങ്ങള്‍ കേസില്‍ കക്ഷി ചേരുകയും ചെയ്തു. ഇന്നലെ ഹരജി പരിഗണിച്ച കോടതി സി.കെ മജീദിന്റെ ഹരജി ചെലവു സഹിതം തള്ളുകയായിരുന്നു. കൈയേറ്റം ഒഴിപ്പിച്ചു മുന്നോട്ടു പോകാനും കോടതി പഞ്ചായത്തിന് നിര്‍ദ്ദേശം നല്‍കി. ജസ്റ്റിസ് വി ചിദംബരേഷാണ് വിധി പ്രസ്താവിച്ചത്.