പേരൂര്‍ക്കട: കുടപ്പനക്കുന്നില്‍ നിര്‍മാണം പൂര്‍ത്തീകരിച്ച രണ്ട് ഹൈടെക് മൃഗാശുപത്രികളുടെ ഉദ്ഘാടനം അടുത്തമാസത്തോടെയുണ്ടാകും. അത്യാധുനിക മെഷീനുകള്‍ ഉള്‍പ്പടെയുള്ള സൗകര്യങ്ങള്‍ പൂര്‍ണ സജ്ജമായിട്ടുണ്ട്.
കുടപ്പനക്കുന്ന് ലൈവ്‌സ്റ്റോക്ക് ഫാമിന്റെ വകയായ സ്ഥലത്താണ് രണ്ട് ആശുപത്രികളും നിര്‍മിച്ചിരിക്കുന്നത്. ഇതില്‍ ഒന്ന് ഹൈടെക് മള്‍ട്ടി സ്‌പെഷ്യാലിറ്റി ആശുപത്രിയാണ്. മറ്റൊന്ന് കുളമ്പുരോഗത്തിനു ചികിത്സിക്കായുള്ളതും. ലൈവ്‌സ്റ്റോക്ക് ഫാമിലേതു കൂടാതെ നാല്‍ക്കാലികളെ വളര്‍ത്തുന്ന പൊതുജനങ്ങള്‍ക്കും ആശുപത്രികളുടെ പ്രയോജനം ലഭിക്കും. പ്രത്യേക കൗണ്ടറും ഇതോടനുബന്ധിച്ച് സജ്ജീകരിച്ചിട്ടുണ്ട്. ലൈവ് സ്റ്റോക്ക് ഫാമില്‍ ഇപ്പോള്‍ കുളമ്പുരോഗത്തിന് ചികിത്സിക്കാന്‍ ഡോക്ടര്‍മാരുടെ കുറവുണ്ട്. കുളമ്പു രോഗം ബാധിച്ച് ഇവിടെ മൃഗങ്ങള്‍ ചാകുന്നത് പതിവുമായിട്ടുണ്ട്. കുളമ്പുരോഗത്തിനായുള്ള പുതിയ ആശുപത്രി ഇതിന് ശാശ്വത പരിഹാരമാകും. സാധാരണ മള്‍ട്ടി സ്‌പെഷ്യാലിറ്റി ആശുപത്രിയില്‍ ഉള്ള അതേ സൗകര്യങ്ങള്‍ ഈ ആശുപത്രികളിലും ഒരുക്കിയിട്ടുണ്ട്. ആശുപത്രിയിലേക്കുള്ള ജീവനക്കാരുടെ നിയമനവും അധികം
വൈകാതെയുണ്ടാകുമെന്നാണ് വിവരം.