തിരുവനന്തപുരം: കൊച്ചി മെട്രോ റെയില്‍ എം.ഡി മുഹമ്മദ് ഹനീഷിനെ തല്‍സ്ഥാനത്തു നിന്നുമാറ്റാന്‍ മന്ത്രിസഭാ യോഗ തീരുമാനം. വ്യവസായ വകുപ്പ് സെക്രട്ടറിയായി പുതിയ ചുമതല നല്‍കാനാണ് ഇന്നലെ ചേര്‍ന്ന യോഗത്തില്‍ തീരുമാനമായത്. എറണാകുളം കലക്ടര്‍ മുഹമ്മദ് സഫീറുള്ളയെയും ചുമതലയില്‍ നിന്ന് മാറ്റിയിട്ടുണ്ട്. എസ്.ജി.എസ്.ടി വകുപ്പ് അഡീഷണല്‍ കമ്മീഷണറായാണ് പുതിയ നിയമനം. മലപ്പുറം ജില്ലാ കലക്ടര്‍ അമിത് മീണയെ അനര്‍ട്ട് ഡയറക്ടറായും പത്തനംതിട്ട കലക്ടര്‍ പി.ബി നൂഹിനെ തിരുവനന്തപുരം ജില്ലാ കലക്ടറായും നിയോഗിച്ചിട്ടുണ്ട്. സംസാകാരിക വകുപ്പ് സെക്രട്ടറി റാണി ജോര്‍ജിന് നിലവിലുള്ള ചുമതലകള്‍ക്ക് പുറമേ സംസ്ഥാന സഹകരണ ബാങ്ക് എം.ഡിയുടെ അധിക ചുമതലകൂടി നല്‍കും.