കരിമണ്ണൂര്‍: മികച്ച സാമൂഹ്യ സേവന പ്രവര്‍ത്തനങ്ങള്‍ നടത്തിയ പ്രോഗ്രാം ഓഫീസര്‍മാര്‍ക്കും വളണ്ടിയര്‍മാര്‍ക്കുമുള്ള സംസ്ഥാന-ജില്ലാതല നാഷണല്‍ സര്‍വീസ് സ്‌കീം അവാര്‍ഡ് കരിമണ്ണൂര്‍ സെന്റ് ജോസഫ്‌സ് ഹയര്‍ സെക്കന്‍ഡറി സ്‌കൂളിന്. എന്‍എസ്എസ് പ്രോഗ്രാം ഓഫീസര്‍ ബിന്ദു. പി .കുര്യാക്കോസിന് പ്രോഗ്രാം ഓഫീസര്‍മാര്‍ക്കുള്ള സംസ്ഥാനതല സ്‌പെഷ്യല്‍ അപ്രിയേഷന്‍ അവാര്‍ഡും വിദ്യാലയത്തിലെ എന്‍എസ്എസ് അംഗം കെ. എച്ച് . ഉവൈസുദ്ദീന്‍ ജില്ലയിലെ മികച്ച വളണ്ടിയര്‍ക്കുള്ള അവാര്‍ഡും നേടി.
കഴിഞ്ഞ വര്‍ഷങ്ങളില്‍ എന്‍എസ്എസ് നേതൃത്വത്തില്‍ വിദ്യാലയത്തില്‍ നടത്തിയ വിവിധ സാമൂഹ്യ-ബോധവല്‍ക്കരണ പരിപാടികളാണ് അവാര്‍ഡിന് പരിഗണിച്ചത്. 'സഹപാഠിക്കൊരു സ്‌നേഹവീട്' പദ്ധതിപ്രകാരം മൂന്നു വര്‍ഷത്തിനിടയില്‍ മൂന്ന് വീടുകള്‍ നിര്‍മിച്ച് നല്‍കി. വിദ്യാര്‍ഥികളില്‍ കൃഷിയോട് ആഭിമുഖ്യം വളര്‍ത്തുന്നതിന് ഒന്നര ഏക്കര്‍ സ്ഥലത്താണ് കൃഷിയിടം ഒരുക്കിയിട്ടുള്ളത്.
ആരോഗ്യ ബോധവല്‍ക്കരണ പ്രവര്‍ത്തനങ്ങളുടെ ഭാഗമായി ദന്ത സംരക്ഷണ ക്യാംപ്, നേത്രരോഗ പരിശോധനാ ക്യാംപ് എന്നിവ സംഘടിപ്പിച്ചു. കൂടാതെ വിവിധ സെമിനാറുകളും സംഘടിപ്പിക്കാനായി. 2016ല്‍ മൈസൂറില്‍ നടന്ന നാഷണല്‍ ഇന്റഗ്രേഷന്‍ ക്യാമ്പിലേക്ക് തെരഞ്ഞെടുക്കപ്പെട്ട വളണ്ടിയറാണ് ജില്ലാതല പുരസ്‌കാരം നേടിയ കെ. എച്ച് . ഉവൈസുദ്ദീന്‍.