തിരുവനന്തപുരം: ട്രെയിനിറങ്ങിയാല്‍ തുടര്‍യാത്രയ്ക്കായി മറ്റുവാഹനങ്ങള്‍ക്കായുള്ള കാത്തിരിപ്പ് അവസാനിപ്പിക്കാന്‍ റെയില്‍വേ.
റെന്റ് എ ബൈക്ക് പദ്ധതിയാണ് 15 സ്റ്റേഷനുകളില്‍ റെയില്‍വേ ഒരുക്കുന്നത്. യാത്രക്കാര്‍ക്കിനി സ്റ്റേഷനില്‍നിന്നു തന്നെ സ്‌കൂട്ടറോ ബൈക്കോ വാടകയ്‌ക്കെടുത്ത് തുടര്‍യാത്ര നടത്താം.
തിരുവനന്തപുരം, കൊച്ചുവേളി, കഴക്കൂട്ടം, വര്‍ക്കല, കൊല്ലം, ചെങ്ങന്നൂര്‍, കോട്ടയം, തൃപ്പൂണിത്തുറ, ആലപ്പുഴ, എറണാകുളം സൗത്ത്, നോര്‍ത്ത്, ആലുവ, അങ്കമാലി, ചാലക്കുടി, തൃശൂര്‍ എന്നിവിടങ്ങളിലാണ് പദ്ധതി നടപ്പിലാക്കുക. സ്വകാര്യ സ്ഥാപനങ്ങളുമായി സഹകരിച്ചുള്ള പദ്ധതിക്ക് ടെണ്ടര്‍ ക്ഷണിച്ചുകഴിഞ്ഞു. ഡിസംബര്‍ ആദ്യവാരം ഏറ്റവും അനുയോജ്യമായ കമ്പനിക്കു പദ്ധതി നടത്തിപ്പു ചുമതല നല്‍കുമെന്ന് റെയില്‍വേ ഡിവിഷനല്‍ കൊമേഴ്‌സ്യല്‍ മാനേജര്‍ ബാലമുരളി അറിയിച്ചു.
ട്രെയിന്‍ ഇറങ്ങി വരുന്ന യാത്രക്കാരനു സ്റ്റേഷനില്‍ തന്നെയുള്ള പ്രത്യേക കൗണ്ടറില്‍ ബന്ധപ്പെട്ടാല്‍ ബൈക്ക് വാടകയ്‌ക്കെടുക്കാം. മണിക്കൂര്‍ അടിസ്ഥാനത്തിലാണ് വാടക. മിനിമം തുക 150 രൂപ. എന്നാല്‍ തുടര്‍ന്നുള്ള ഓരോ മണിക്കൂറിലും എത്ര രൂപ ഈടാക്കണമെന്നു തീരുമാനിച്ചിട്ടില്ല. വാടകത്തുകയില്‍ നിശ്ചിത ശതമാനം റെയില്‍വേയ്ക്കു ലഭിക്കും. സ്ത്രീകള്‍ക്കായി ഗിയര്‍ ഇല്ലാത്ത സ്‌കൂട്ടറുകളും ഒരുക്കും.
ബൈക്ക് വാടകയ്ക്ക് എടുക്കുന്നതിനു മുന്‍പ് ആവശ്യക്കാരന്‍ കൃത്യമായ വിവരങ്ങളും രേഖകളും നല്‍കണം. ഡ്രൈവിങ് ലൈസന്‍സിന്റെ പകര്‍പ്പ്, തിരിച്ചറിയല്‍ കാര്‍ഡുകളിലേതെങ്കിലും ഒന്നിന്റെ പകര്‍പ്പ് എന്നിവ നല്‍കണം. ഇന്ധനം നിറയ്ക്കുന്നതിന്റെ ഉത്തരവാദിത്വം വാടകയ്‌ക്കെടുക്കുന്ന ആള്‍ക്കു തന്നെയാണ്. വാഹനം സുരക്ഷിതമായി തിരിച്ചെത്തിക്കുന്നതും വാടകയ്‌ക്കെടുക്കുന്നയാളുടെ ചുമതലയാണ്.