പട്‌ന: ലോക്‌സഭാ തെരഞ്ഞെടുപ്പില്‍ സീറ്റ് പങ്കുവയ്ക്കുന്നതുമായി ബന്ധപ്പെട്ട് ബിഹാറിലെ എന്‍.ഡി.എയില്‍ ഉരുണ്ടുകൂടിയ പ്രതിസന്ധിക്ക് പരിഹാരമായതായി മുഖ്യമന്ത്രി നിതീഷ് കുമാര്‍.
സംസ്ഥാനത്തെ 40 ലോക്‌സഭാ സീറ്റുകളില്‍ 20 എണ്ണത്തിലും ബി.ജെ.പി മത്സരിക്കുമെന്നും ശേഷിക്കുന്ന 20 സീറ്റുകള്‍ ഘടക കക്ഷികള്‍ക്ക് നല്‍കാനുമായിരുന്നു തീരുമാനം. ഇത് ജെ.ഡി.യു അടക്കമുള്ള പാര്‍ട്ടികളെ പ്രകോപിപ്പിച്ചിരുന്നു. എന്നാല്‍ മാന്യമായ രീതിയിലുള്ള സീറ്റ് പങ്കുവയ്ക്കലാണ് ബി.ജെ.പിയുടെ ഭാഗത്തുനിന്നുണ്ടായതെന്ന് നീതീഷ് പറഞ്ഞു.
എത്ര സീറ്റുകളില്‍ പാര്‍ട്ടി മത്സരിക്കുമെന്ന കാര്യം അടുത്തുതന്നെ പുറത്തുവിടുമെന്ന് അദ്ദേഹം അറിയിച്ചു. 20 സീറ്റുകള്‍ ബി.ജെ.പിയെടുക്കുകയും ശേഷിക്കുന്ന 20 സീറ്റുകള്‍ ഘടക കക്ഷികള്‍ക്ക് നല്‍കാനുമായിരുന്നു തീരുമാനം. ഇതില്‍ 12 സീറ്റുകള്‍ ജെ.ഡി.യുവിനും ആറ് സീറ്റുകള്‍ രാംവിലാസ് പാസ്വാന്റെ ലോക് ജനശക്തി പാര്‍ട്ടിക്കും രണ്ട് സീറ്റുകള്‍ ഉപേന്ദ്ര കുശ്‌വാഹയുടെ രാഷ്ട്രീയ ലോക്‌സമതാ പാര്‍ട്ടിക്കും നല്‍കാനായിരുന്നു തീരുമാനം. എന്നാല്‍ ഈ തീരുമാനം അനുയോജ്യമല്ലെന്നും അംഗീകരിക്കാന്‍ കഴിയുന്നതല്ലെന്നും ജെ.ഡി.യു പറഞ്ഞിരുന്നു.
അതേസമയം അവര്‍ സ്വീകരിച്ച സീറ്റ് പങ്കുവയ്ക്കല്‍ ഫോര്‍മുല അംഗീകരിക്കാനാകില്ലെന്ന് അവര്‍ക്കു തന്നെ വ്യക്തമായിരുന്നുവെന്ന് നിതീഷ് കുമാര്‍ പറഞ്ഞു. ജെ.ഡി.യുവും ബി.ജെ.പിയും 17 സീറ്റുകള്‍ വീതം പങ്കുവയ്ക്കുമ്പോള്‍ നിലവില്‍ പാസ്വാന്റെ പാര്‍ട്ടിക്ക് ലഭിച്ചിരുന്ന ആറ് സീറ്റുകള്‍ അവര്‍ക്കു തന്നെ നല്‍കണമെന്നായിരുന്നു ജെ.ഡി.യു മുന്നോട്ടുവച്ചിരുന്നത്.
2014ലെ തെരഞ്ഞെടുപ്പില്‍ 31 സീറ്റുകളില്‍ വിജയിച്ച എന്‍.ഡി.എയില്‍ ബി.ജെ.പിക്ക് തനിച്ച് 22 സീറ്റുകള്‍ ലഭിച്ചിരുന്നു. 17 വര്‍ഷത്തെ ബന്ധം ഉപേക്ഷിച്ചുപോയ ജെ.ഡി.യുവിന് രണ്ട് സീറ്റുകളില്‍ മാത്രമാണ് വിജയിക്കാനായത്.
ഇത്തവണ ഓഗസ്റ്റ് 12ന് മുന്‍പ് സീറ്റ് പങ്കുവയ്ക്കുന്നതുമായി ബന്ധപ്പെട്ട് തീരുമാനമുണ്ടാകണമെന്ന് ജെ.ഡി.യു അന്ത്യശാസനം പുറപ്പെടുവിച്ചിരുന്നു. തുടര്‍ന്ന് അമിത്ഷായുമായി നടത്തിയ ചര്‍ച്ചയിലാണ് അനുകൂലമായ സാഹചര്യമുണ്ടായതെന്ന് ജെ.ഡി.യു നേതാവ് കെ.സി ത്യാഗി പറഞ്ഞു.