ഡി.ജി.പിയുമായി കമ്മിഷന്‍
കൂടിക്കാഴ്ച നടത്തി
സ്വന്തം ലേഖകന്‍
തിരുവനന്തപുരം: തദ്ദേശ തെരഞ്ഞെടുപ്പ് വ്യാഴാഴ്ച പ്രഖ്യാപിച്ചേക്കും. തെരഞ്ഞെടുപ്പില്‍ ക്രമസമാധാനം ഉറപ്പു വരുത്താന്‍ സ്വീകരിക്കേണ്ട നടപടിക്രമങ്ങള്‍ സംസ്ഥാന തെരഞ്ഞെടുപ്പ് കമ്മിഷണര്‍ വി.ഭാസ്‌കരന്‍ ഡി.ജി.പിയുമായി ചര്‍ച്ച നടത്തി. കമ്മിഷന്‍ ആസ്ഥാനത്തായിരുന്നു കൂടിക്കാഴ്ച. ചീഫ് സെക്രട്ടറിയുമായി അടുത്ത ദിവസം ചര്‍ച്ച നടത്തി ഈയാഴ്ച തന്നെ വോട്ടെടുപ്പ് തിയതി പ്രഖ്യാപിക്കാനാണ് ആലോചന. ഡിസംബര്‍ ആദ്യവാരം വോട്ടെടുപ്പ് നടത്തി 31 ന് മുന്‍പ് നടപടി ക്രമങ്ങള്‍ പൂര്‍ത്തിയാക്കാനാണ് തെരഞ്ഞെടുപ്പ് കമ്മിഷന്റെ തീരുമാനം. അങ്ങനെയെങ്കില്‍ ഈയാഴ്ച തിയതി പ്രഖ്യാപിക്കണം.വ്യാഴാഴ്ച പ്രഖ്യാപനമുണ്ടാകുമെന്നാണ് സൂചന.
ഒറ്റ ഘട്ടമായി തെരഞ്ഞെടുപ്പ് നടത്താനാണ് കമ്മിഷന്‍ ആലോചിക്കുന്നത്. കൊവിഡ് പശ്ചാത്തലത്തില്‍ വോട്ടെടുപ്പിന് സാമൂഹിക അകലം പാലിക്കേണ്ടതിനാല്‍ ഓരോ ബൂത്തിലും കൂടുതല്‍ പൊലിസിനെ വിന്യസിക്കേണ്ടിവരും. ക്രമസമാധാനത്തിനും കൂടുതല്‍ പേര്‍ വേണ്ടി വരും. ഇക്കാര്യത്തില്‍ ഡി.ജി.പി ഉറപ്പു നല്‍കിയിട്ടുണ്ട്. പൊലിസ് ബറ്റാലിയന്റെ ചുമതലയുളള എ.ഡി.ജി.പി കെ.പത്മകുമാറും ക്രമസമാധാനത്തിന്റ ചുമതലയുള്ള എ.ഡി.ജി.പി ദര്‍ബേഷ് സാഹിബും ചര്‍ച്ചയില്‍ പങ്കെടുത്തു.
തെരഞ്ഞെടുപ്പ് രണ്ട് ഘട്ടമായി നടത്തുന്നതാണ് ഉചിതമെന്ന് സംസ്ഥാന പൊലിസ് മേധാവി കൂടികാഴ്ചയില്‍ അറിയിച്ചു. എങ്കിലും കമ്മിഷന്‍ നിര്‍ദേശപ്രകാരം പൊലിസ് സേനയെ നല്‍കും. പൊലിസ് വിന്യാസത്തിന്റെ കാര്യം ചര്‍ച്ച ചെയ്തു തീരുമാനിക്കുമെന്ന് ഡി.ജി.പി ലോക്‌നാഥ് ബഹ്‌റ പറഞ്ഞു. വോട്ടെടുപ്പ് ദിവസത്തിന് തൊട്ടുമുന്‍പ് കൊവിഡ് പോസിറ്റീവ് ആകുന്നവര്‍ക്ക് തപാല്‍ വോട്ട് അനുവദിക്കാനുള്ള നടപടികളും കമ്മിഷന്‍ ചെയ്യുന്നുണ്ട്. ആരോഗ്യ വകുപ്പുമായി ഇതു സംബന്ധിച്ചു ചര്‍ച്ച നടത്തും. തദ്ദേശ സ്ഥാപനങ്ങളിലെ ഭരണസമിതിയുടെ കാലാവധി ഈ മാസം 11 ന് തീരുകയാണ്. അതിനു ശേഷം ഉദ്യോഗസ്ഥ ഭരണം ഏര്‍പ്പെടുത്താനാണ് തീരുമാനം. ഇക്കാര്യം നാളത്തെ മന്ത്രിസഭാ യോഗത്തില്‍ തീരുമാനിക്കും.