ചാലക്കുടി: നെടുമ്പാശേരിയില്‍നിന്നു തിരിച്ച രണ്ടംഗ സംഘത്തെ ആക്രമിച്ചു സ്വര്‍ണം തട്ടിയ സംഭവത്തില്‍ പ്രതികള്‍ക്കായി പൊലിസ് അന്വേഷണം ഊര്‍ജിതമാക്കി. പ്രതികളെ കുറിച്ചു വ്യക്തമായ സൂചന ലഭിച്ചതായാണു വിവരം. മലപ്പുറം, കോഴിക്കോട് ജില്ലകളെ കേന്ദ്രീകരിച്ചാണ് അന്വേഷണം നടക്കുന്നത്.
നെടുമ്പാശേരി വിമാനത്താവളത്തില്‍നിന്ന് കാര്‍മാര്‍ഗം സ്വര്‍ണവുമായി കൊടുവള്ളിയിലേക്കു പോവുകയായിരുന്ന ഉവൈസ്, ഹര്‍ഷാദ് എന്നിവരാണ് ആക്രമണത്തിനിരയായത്. ഇവരുടെ കാറിനുപിറകില്‍ ഇന്നോവ കാറിടിച്ച് അക്രമിസംഘം 560 ഗ്രാം സ്വര്‍ണവുമായി കടന്നുകളയുകയായിരുന്നുവെന്ന് ഇവര്‍ പൊലിസില്‍ നല്‍കിയ പരാതിയില്‍ പറയുന്നു. പോട്ട മേല്‍പാലത്തിനടുത്ത് 15നു വെളുപ്പിന് 6.30ഓടെയായിരുന്നു സംഭവം. കൊച്ചിയില്‍നിന്ന് കസ്റ്റംസ് ഉദ്യോഗസ്ഥര്‍ സ്ഥലത്തെത്തി പരാതിക്കാരുടെ മൊഴിയെടുത്തു.
കണ്ണൂര്‍ സ്വദേശി ദുബൈയില്‍നിന്ന് നെടുമ്പാശേരിയിലെത്തി കൈമാറിയ സ്വര്‍ണമാണ് അക്രമികള്‍ കവര്‍ന്നതെന്നാണു പരാതിക്കാര്‍ നല്‍കുന്ന വിവരം. സ്വര്‍ണം കൊണ്ടുവന്നയാളെ സ്വന്തം കാറില്‍ ആലുവ റെയില്‍വേ സ്റ്റേഷനില്‍ കൊണ്ടാക്കിയ ശേഷമാണ് ഇരുവരും കൊടുവള്ളിയിലേക്കു മടങ്ങിയത്. എന്നാല്‍ പരാതിക്കാര്‍ കുഴല്‍പണ മാഫിയയിലെ കണ്ണികളാണെന്ന നിഗമനത്തിന്റെ അടിസ്ഥാനത്തില്‍ ഇവരെ പൊലിസ് കൂടുതല്‍ ചോദ്യം ചെയ്യും.