ടോക്കിയോ: ജപ്പാനിലെ ടോക്കിയോയില്‍ മാനസികാരോഗ്യ കേന്ദ്രത്തില്‍ നടന്ന കഠാര ആക്രമണത്തില്‍ 19 പേര്‍ കൊല്ലപ്പെട്ടു. 45ലേറെ പേര്‍ക്കു പരുക്കേറ്റിട്ടുണ്ട്. ഇതില്‍ 28 പേരുടെ നില ഗുരുതരമാണ്. മാനസിക രോഗികളും ഭിന്നശേഷിക്കാരും താമസിക്കുന്ന റസിഡന്‍ഷ്യല്‍ സെന്ററിലാണ് അക്രമം. പ്രാദേശിക സമയം പുലര്‍ച്ചെ 2.30നായിരുന്നു സംഭവം. സെന്ററിലെ മുന്‍ ജീവനക്കാരനായ 26 വയസുകാരന്‍ സതോഷി ഇമാഷുവാണ് കഠാര അക്രമം നടത്തിയത്.

ഇയാളെ പൊലിസ് അറസ്റ്റ് ചെയ്തു. ടോക്കിയോക്ക് പടിഞ്ഞാറ് സാഗമിഹാരയിലാണ് സംഭവം. സംഭവം നടക്കുമ്പോള്‍ 16ദ പേരാണ് ഇവിടെയുണ്ടായിരുന്നത്. ജപ്പാനിലെ പ്രാദേശിക സര്‍ക്കാരിനു കീഴില്‍ പ്രവര്‍ത്തിക്കുന്ന സ്ഥാപനമാണിത്. അക്രമി പിന്നീട് പൊലിസ് സ്റ്റേഷനിലെത്തി കീഴടങ്ങുകയായിരുന്നു. ഇയാളുടെ ബാഗില്‍ നിന്ന് രക്തം പുരണ്ട കത്തിയും മറ്റു ആയുധങ്ങളും കണ്ടെടുത്തിട്ടുണ്ട്. മാനസിക രോഗികളെ ഈ ലോകത്തുനിന്നു മോചിപ്പിക്കുന്നതിനു വേണ്ടിയാണ് അക്രമം നടത്തിയതെന്ന് അക്രമി പൊലിസിനു മൊഴി നല്‍കി.