ആലുവ:ഹീമോഫീലിയ ചികിത്സയുടെ ഗുണനിലവാരം മെച്ചപ്പെടുത്തുന്നതിന്റെ ഭാഗമായി ഇംഗ്ലണ്ടിലെ പ്രശസ്തമായ ചികിത്സാകേന്ദ്രങ്ങളുമായി സഹകരിച്ച് ട്വിന്നിംഗ് പരിപാടിക്ക് ധാരണയായി.
സംസ്ഥാനം സന്ദര്‍ശിക്കുന്ന വേള്‍ഡ് ഹീമോഫീലിയ ഫെഡറേഷന്‍ പ്രതിനിധികള്‍ ഇന്നസെന്റ് എം.പിയുടെ സാന്നിധ്യത്തില്‍ കേരളത്തിലെ മുന്‍നിര ചികിത്സാകേന്ദ്രമായ ആലുവ ജില്ലാ ആശുപത്രി അധികൃതരുമായി നടത്തിയ ചര്‍ച്ചയിലാണ് തീരുമാനം. കേരളത്തിലെ ഏറ്റവും പ്രമുഖമായ ഹീമോഫീലിയ ചികിത്സാ കേന്ദ്രമാണ് ആലുവ ജില്ലാ ആശുപത്രിയില്‍ ഉള്ളത്. ട്വിന്നിംഗ് പരിപാടിയുടെ ഭാഗമായി ഇംഗ്ലണ്ട്, അമേരിക്ക എന്നിവയുള്‍പ്പെടെ വികസിത രാജ്യങ്ങളിലെ ഹീമോഫീലിയ ചികിത്സാകേന്ദ്രങ്ങളുമായി വിജ്ഞാന കൈമാറ്റത്തിനും പരിശീലനം, ചികിത്സ, വികസന പദ്ധതികള്‍ എന്നിവയുടെ പരസ്പര സഹകരണത്തിനും വഴി തുറക്കും. നാല് വര്‍ഷത്തേക്കാണ് പരിപാടി നടപ്പാക്കുക.
ലോകത്തെ ഏറ്റവും മികച്ച ചികിത്സാ കേന്ദ്രങ്ങളുമായുള്ള സഹകരണം ഉറപ്പാക്കുന്നതിലൂടെ സാങ്കേതിക മികവും വിഭവ ശേഷിയും കൈവരിക്കാന്‍ ആലുവ കേന്ദ്രത്തിന് കഴിയും.
സംസ്ഥാനത്തെ ഹീമോഫീലിയ ചികിത്സാരംഗത്ത് കുതിച്ചു ചാട്ടം സൃഷ്ടിക്കാന്‍ ഇതിലൂടെ കഴിയുമെന്ന് ഇന്നസെന്റ് എം.പി പറഞ്ഞു.ഹീമോഫീലിയ ചികിത്സാരംഗത്ത് വിദേശ രാജ്യങ്ങളില്‍ മാത്രം അനുവര്‍ത്തിക്കുന്ന അക്വാ തെറാപ്പി ഇവിടേക്ക് പകര്‍ത്തുന്നതിനായി അക്വാ ട്രീറ്റ്‌മെന്റ് പ്ലാന്റ് സ്ഥാപിക്കണമെന്ന നിര്‍ദ്ദേശം പരിഗണിക്കുമെന്ന് ഇന്നസെന്റ് അറിയിച്ചു. ഇക്കാര്യത്തില്‍ വേള്‍ഡ് ഹീമോഫീലിയ ഫെഡറേഷന്റെ സഹകരണം ഉണ്ടാവുമെന്ന് പ്രതിനിധികള്‍ അറിയിച്ചു. ആലുവയില്‍ നടന്ന കൂടിക്കാഴ്ചയില്‍ ഫെഡറേഷന്‍ പ്രതിനിധികളും ഇംഗ്ലണ്ടിലെ ന്യൂ കാസില്‍ ഹീമോഫീലിയ സെന്ററിലെ ഡോക്ടര്‍മാരുമായ ഡോ. ടിനാബിസ്, ഡോ. പോള്‍ മര്‍ഫി എന്നിവരും ആലുവ ജില്ലാ ആശുപത്രി സൂപ്രണ്ട് ഡോ. അനില്‍കുമാര്‍, ഡോ. വിജയകുമാര്‍ തുടങ്ങിയവരും പങ്കെടുത്തു.