തിരുവനന്തപുരം: മുഖ്യമന്ത്രി പിണറായി വിജയന് ധാര്‍മികത പറയാന്‍ അവകാശമില്ലെന്ന് പ്രതിപക്ഷ നേതാവ് രമേശ് ചെന്നിത്തല. പാര്‍ട്ടി സെക്രട്ടറിയുടെ മകന്റെ മയക്കുമരുന്ന് കേസ് പുറത്ത് വരുന്നതില്‍ മുഖ്യമന്ത്രി അസ്വസ്ഥനാവുകയാണ്. മോദിയെയും അമിത് ഷായെയും മുഖ്യമന്ത്രി എന്തിന് പേടിക്കണം? ലാവലിന്‍ കേസില്‍ മുഖ്യമന്ത്രി കേന്ദ്ര സര്‍ക്കാറുമായി ഒത്തുതീര്‍പ്പുണ്ടാക്കിയെന്നും ചെന്നിത്തല ആരോപിച്ചു.

അന്വേഷണ ഏജന്‍സികളെ കൊണ്ടുവന്നത് മുഖ്യമന്ത്രിയാണ്. എന്നിട്ടിപ്പോള്‍ അവരെ ഭീഷണിപ്പെടുത്തുന്നു. ഒന്നും മറയ്ക്കാനില്ലെങ്കില്‍ അന്വേഷണത്തിന് വിട്ടുകൊടുക്കണം. അന്വേഷണ ഏജന്‍സികള്‍ ചോദിക്കുന്ന വസ്തുതകള്‍ നല്‍കാത്തതും കുറ്റകൃത്യമാണ്.

സ്വര്‍ണ്ണക്കടത്ത് കേസില്‍ അന്വേഷണം തന്നിലേക്കെത്തുമോ എന്ന് മുഖ്യമന്ത്രി ഭപ്പെടുന്നുവെന്നും അദ്ദേഹം ആരോപിച്ചു. സത്യം തെളിയിക്കുന്ന കാര്യത്തില്‍ സര്‍ക്കാരിന് ആത്മാര്‍ത്ഥതയില്ല. എം ശിവശങ്കര്‍ അഞ്ചാം പ്രതിയാണെങ്കില്‍ മുഖ്യമന്ത്രി ഒന്നാം പ്രതിയാണ്. ശിവശങ്കര്‍ വിജിലന്‍സ് കേസില്‍ പ്രതിയായ സാഹചര്യത്തില്‍ മുഖ്യമന്ത്രി ആ വകുപ്പ് ഒഴിയണം. പ്രതിപക്ഷത്തിനെതിരെ പൊലിസിനെ ദുരുപയോഗിച്ച് കള്ളക്കേസെടുക്കുന്നു. ലാവ്‌ലിന്‍ കേസ് മാറ്റി വക്കുന്നത് ഒത്തു കളിയാണെന്നും ചെന്നിത്തല ആരോപിച്ചു.