തുവ്വുര്‍: വലിയട്ടയിലെ മുതിരപ്പറമ്പന്‍ റഷീദയുടെ വീടും ഇനി പ്രകാശിക്കും. ജൂനിയര്‍ ചേംബര്‍ കര്‍ക്കിടാംകുന്ന് ചാപ്റ്റര്‍ ആവിഷ്‌ക്കരിച്ചു നടപ്പാക്കിയ വെട്ടം പദ്ധതി വഴിയാണ് വൈദ്യുതീകരണം നടപ്പിലാക്കിയത്. പാവപ്പെട്ട കുടുംബങ്ങളില്‍ പൂര്‍ണമായും സൗജന്യമായാണ് വൈദ്യുതി കണക്ഷന്‍ നല്‍കുന്നത്. തുവ്വുരിലെ വാട്ട്‌സ്ആപ്പ് കൂട്ടായ്മകള്‍ വഴിയാണ് വെട്ടം പദ്ധതിയുടെ ഗുണഭോക്ത്താവായി റഷീദയെ തെരഞ്ഞെടുത്തത്. വിദ്യാര്‍ഥികളായ നാലുമക്കളടങ്ങുന്ന റഷീദയുടെ കുടുംബം മണ്ണെണ്ണ വിളക്കിന്റെ അരണ്ട വെളിച്ചത്തിലാണ് പഠനം നടത്തിയിരുന്നത് .വീട് സൗജന്യമായി വൈദ്യുതീകരിച്ചു കണക്ഷന്‍ ലഭിച്ചപ്പോഴുള്ള സന്തോഷത്തിലാണ് ഈ കുടുംബവും നാട്ടുകാരും.
റഷീദയുടെ വീട്ടില്‍വെച്ചു നടന്ന ലളിതമായ ചടങ്ങില്‍ തുവ്വുര്‍ ഗ്രാമ പഞ്ചായത്ത് സെക്രട്ടറി കെ.ഷാനിര്‍ വൈദ്യുതി കണക്ഷന്‍ സ്വിച്ഓണ്‍ കര്‍മം നിര്‍വഹിച്ചു .ജെ.സി.ഐ.ചാപ്റ്റര്‍ പ്രസിഡണ്ട് ശുഹൈബ് കര്‍ക്കിടാംകുന്ന് അധ്യക്ഷനായി. നാഷണല്‍ കോ.ഓര്‍ഡിനേറ്റര്‍ അബ്ദുല്‍സലാം പാലക്കാട് മുഖ്യാഥിതിയായിരുന്നു .ഇ.പി.മൂസ ,എം.ലത്തീഫ്,അഡ്വ.വി.ഷംസുദ്ധീന്‍, ടി.പി.ഷാനവാസ് , എ.ഫാറൂഖ് , ചാപ്റ്റര്‍ സെക്രട്ടറി സി.കെ.ഷെരീഫ്, സ്വാലിഹ് അയനിക്കല്‍ എന്നിവര്‍ സംസാരിച്ചു.