നിലമ്പൂര്‍: വെളിയംതോടിലെ ഗോത്രവര്‍ഗ വിഭാഗങ്ങള്‍ക്കുള്ള ഇന്ദിരാഗാന്ധി മെമ്മോറിയല്‍ റസിഡന്‍ഷ്യല്‍ സ്‌കൂളിന്റെ ഹോസ്റ്റലില്‍ നിന്നും രണ്ടു പെണ്‍കുട്ടികളെ കാണാതായി. ഇന്നലെ രാത്രി ഒമ്പതു മണിക്ക് ശേഷമാണ് പെണ്‍കുട്ടികളെ കാണാതായത്.
പെരിന്തല്‍മണ്ണ തിരുവഴാംകുന്ന് സ്വദേശികളായ വിദ്യാര്‍ഥിനികളെയാണ് കാണാതായത്. ഒരാള്‍ അഞ്ചാം ക്ലാസിലും, മറ്റൊരാള്‍ എട്ടാം ക്ലാസിലുമാണ് പഠിക്കുന്നത്. ഇരവരും ഒരു മാസം മുമ്പാണ് സ്‌കൂളിലെത്തിയത്. അഞ്ചു ദിവസമായി ഇവര്‍ ക്ലാസില്‍ കയറിയിട്ടില്ല. ഇരുവര്‍ക്കും അസുഖമായിരുന്നുവെന്ന് പറയുന്നു.
നിലമ്പൂര്‍ ജില്ലാ ആശുപത്രിയിലും കുട്ടികള്‍ക്ക് ചികിത്സ നല്‍കിയിരുന്നു. സ്‌കൂളില്‍ തുടരാന്‍ താല്‍പര്യമില്ലെന്നും കോളനിയിലേക്ക് തിരിച്ചയക്കണമെന്നും ഇവര്‍ അധ്യാപകരോട് പറഞ്ഞിരുന്നു. ഇതിനെ തുടര്‍ന്ന് അധികൃതര്‍ രക്ഷിതാക്കളെ വിളിച്ചുവരുത്തി. എന്നാല്‍ സ്‌കൂളില്‍ തന്നെ നിര്‍ത്താന്‍ രക്ഷിതാക്കള്‍ ആവശ്യപ്പെട്ടതോടെ ഇവിടെ തന്നെ നിര്‍ത്തുകയായിരുന്നു.
ഇതിനിടയിലാണ് ഇന്നലെ രാത്രി ഒമ്പതു മണിക്ക് ശേഷം കുട്ടികളെ കാണാതായത്. സ്‌കൂള്‍ അധികൃതര്‍ പൊലിസില്‍ വിവരം അറിയിച്ചു.