അമ്പലപ്പുഴ: സ്വകാര്യ ധനകാര്യ സ്ഥാപനത്തിലെ ജീവനക്കാരിയെ ഹെല്‍മറ്റ് ധരിച്ചെത്തിയ യുവാവ് അക്രമിച്ച് മാല കവര്‍ന്നു.
പുന്നപ്ര തെക്കു പഞ്ചായത്ത് മണിമന്ദിരത്തില്‍ പ്രദീപിന്റെ ഭാര്യ മിനിയുടെ നാലരപ്പവന്‍ തൂക്കം വരുന്ന മാലയാണ് കവര്‍ന്നത്.ഇന്നലെ ഉച്ചക്ക് 12 ഓടെയാണ് സംഭവം.
അമ്പലപ്പുഴ കച്ചേരി മുക്കിന് കിഴക്കുവശം എസ്.ബി.ഐയുടെ എതിര്‍വശത്തുള്ള കെട്ടിടത്തില്‍ പ്രവര്‍ത്തിക്കുന്ന സ്വകാര്യ ധനകാര്യ സ്ഥാപനത്തില്‍ കയറിയാണ് യുവാവ് മാല കവര്‍ന്നത്.സ്ഥാപനത്തില്‍ ഹെല്‍മറ്റ് ധരിച്ചെത്തിയ യുവാവ് ലോക്കറിന്റെ താക്കോല്‍ ആവശ്യപ്പെട്ടു. ഇതു നല്‍കാതിരുന്നപ്പോള്‍ മിനിയുടെ കഴുത്തില്‍ കിടന്ന മാല യുവാവ് കവരുകയായിരുന്നു.
മിനി യുവാവിന്റെ പുറകെ ഓടിയെങ്കിലും യുവാവ് ബൈക്കില്‍ കയറി രക്ഷപ്പെടുകയായിരുന്നു.
നാട്ടുകാരില്‍ ചിലര്‍ ബൈക്കില്‍ പിന്നാലെ പോയെങ്കിലും യുവാവിനെ കണ്ടെത്താനായില്ല. ഈ സ്ഥാപനത്തിന്റെ എതിര്‍ വശത്തുള്ള ഇന്ത്യന്‍ ബാങ്കിന്റെ കാമറയില്‍ യുവാവിന്റെ ദൃശ്ര്യം പതിഞ്ഞിട്ടുണ്ടെങ്കിലും ഹെല്‍മറ്റ് ധരിച്ചിരുന്നതിനാല്‍ ആളെ വ്യക്തമല്ലെന്ന് കാമറ ദൃശ്യം പരിശോധിച്ച ശേഷം പോലീസ് പറഞ്ഞു. ബൈക്ക് നമ്പരും വ്യക്തമായിട്ടില്ല.