തിരുവനന്തപുരം: കുന്നത്തുനാട് നിലംനികത്തലുമായി ബന്ധപ്പെട്ട് കര്‍ശന നിലപാടുമായി റവന്യൂ മന്ത്രി ഇ. ചന്ദ്രശേഖരന്‍. വിഷയത്തില്‍ താനറിയാതെ ഒരു ഫയലും നീങ്ങരുതെന്ന് മന്ത്രി റവന്യൂ സെക്രട്ടറിക്ക് രേഖാമൂലം നിര്‍ദേശം നല്‍കി. എ.ജി നല്‍കിയ നിയമോപദേശത്തിന്റെ അടിസ്ഥാനത്തില്‍, സ്ഥലം മണ്ണിട്ട് നികത്തുന്നതിന് താനറിയാതെ ഉത്തരവ് ഇറക്കിയതിലെ അതൃപ്തിയും മന്ത്രി ഉദ്യോഗസ്ഥരെ അറിയിച്ചിട്ടുണ്ട്. റവന്യൂമന്ത്രിയുടെ ഓഫിസ് അറിയാതെ മുഖ്യമന്ത്രിയുടെ ഓഫിസ് ഇടപെട്ട് ഇതുസംബന്ധിച്ച ഫയലുകള്‍ നീക്കുന്നുവെന്ന ആരോപണം നിലനില്‍ക്കുമ്പോഴാണ് റവന്യൂമന്ത്രി ഉദ്യോഗസ്ഥര്‍ക്ക് കര്‍ശന നിര്‍ദേശം നല്‍കിയിരിക്കുന്നത്. നേരത്തേ കുന്നത്തുനാട് വില്ലേജിലെ 15 ഏക്കര്‍ നിലം മണ്ണിട്ട് നികത്താനുള്ള റിയല്‍ എസ്റ്റേറ്റ് കമ്പനിയുടെ നീക്കം എറണാകുളം ജില്ലാ കലക്ടര്‍ ഇടപെട്ട് തടഞ്ഞിരുന്നു.

ഇതിനിടയിലാണ് ഈ വിഷയത്തില്‍ താനറിയാതെ തീരുമാനങ്ങള്‍ എടുക്കരുതെന്ന് കാണിച്ച് റവന്യൂ സെക്രട്ടറിയുടെ ചുമതല വഹിക്കുന്ന അഡീഷനല്‍ ചീഫ് സെക്രട്ടറി ഡോ. വി. വേണുവിന് മന്ത്രി നിര്‍ദേശം നല്‍കിയത്. മന്ത്രിക്ക് പിന്തുണയുമായി കാനം രാജേന്ദ്രനും രംഗത്തെത്തി.