ചെന്നൈ: ബിജെപിയുടെ വേല്‍ യാത്രാ പ്രചരണത്തിനായി തമിഴ്‌നാട് മുന്‍ മുഖ്യമന്ത്രിയുടെ ചിത്രം ഉപയോഗിച്ചതിനെതിരേ പ്രതിഷേധം കനക്കുന്നു.പ്രതിഷേധിച്ച് എ.ഐ.ഡി.എം.കെ രംഗത്തെത്തി.

പാര്‍ട്ടിയുടെ സ്വന്തം നേതാക്കളുടെ ഫോട്ടോ വേണം ഇത്തരം പ്രചരണങ്ങളില്‍ ഉപയോഗിക്കാനെന്നും എം.ജി.ആറിന്റെ ചിത്രമുപയോഗിക്കാന്‍ ബി.ജെ.പിയ്ക്ക് അവകാശമില്ലെന്നും എ.ഐ.എ.ഡി.എം.കെ നേതാവ് ഡി. ജയകുമാര്‍ പറഞ്ഞു.

'അവര്‍ക്ക് സ്വന്തമായി നേതാക്കള്‍ ഇല്ലേ? പിന്നെന്തിനാണ് ഞങ്ങളുടെ നേതാവിന്റെ ചിത്രമുപയോഗിക്കുന്നത്. എം.ജി.ആര്‍ ഞങ്ങളുടെ മാത്രം നേതാവാണ്. എ.ഐ.എ.ഡി.എം.കെ സ്ഥാപിച്ച നേതാവാണ് അദ്ദേഹം. പാര്‍ട്ടിയെ വിജയത്തിലേക്കെത്തിച്ച മനുഷ്യനാണ് എം.ജി.ആര്‍. അദ്ദേഹത്തിന്റെ ചിത്രമുപയോഗിക്കാന്‍ മറ്റൊരു പാര്‍ട്ടിയ്ക്കും അധികാരമില്ല ജയകുമാര്‍ പറഞ്ഞു'

വേല്‍ യാത്രയുമായി ബന്ധപ്പെട്ട് കഴിഞ്ഞ ദിവസം ബി.ജെ.പി പുറത്തിറക്കിയ വീഡിയോയിലാണ് എം.ജി.ആറിന്റെ ചിത്രം പ്രത്യക്ഷപ്പെട്ടത്. മൂന്ന് മിനിറ്റ് ദൈര്‍ഘ്യമുള്ള വീഡിയോയില്‍ മോദിയെപ്പറ്റിയും പരാമര്‍ശിക്കുന്നുണ്ട്.

അതേസമയം നവംബര്‍ ആറ് മുതല്‍ തമിഴ്‌നാട്ടില്‍ വേല്‍ യാത്ര സംഘടിപ്പിക്കാനൊരുങ്ങുകയാണ് ബി.ജെ.പി നേതൃത്വം. സംസ്ഥാനത്തെ ഹിന്ദുവോട്ടുകള്‍ ഏകീകരിക്കുകയാണ് യാത്രയുടെ ലക്ഷ്യം. പിന്നാക്ക സമുദായങ്ങളില്‍ നിന്നുള്ള മുരുക ഭക്തരാണ് യാത്രയുടെ പ്രധാന ലക്ഷ്യം.