കല്‍പ്പറ്റ: റവന്യു ജീവനക്കാര്‍ക്ക് മതിയായ സംരക്ഷണം ഉറപ്പ് വരുത്തുക, വില്ലേജ് ഫീല്‍ഡ് അസിസ്റ്റന്റ്മാര്‍ക്കും ഓഫിസ് അസിസ്റ്റന്റ്മാര്‍ക്കും പ്രമോഷന്‍ ക്വാട്ട വര്‍ധിപ്പിക്കുക, വില്ലേജ് ഓഫിസര്‍ തസ്തിക ഡെപ്യുട്ടി തഹസില്‍ദാര്‍ തസ്തികയിലേക്ക് ഉയര്‍ത്തുക, കേരള അഡ്മിനിസ്‌ട്രേറ്റീവ് സര്‍വിസിലെ റവന്യു ജീവനക്കാരുടെ ആശങ്ക പരിഹരിക്കുക, നൈറ്റ് വാച്ച്മാന്‍ തസ്തിക സൃഷ്ടിക്കുക, രണ്ടാം ഘട്ട റവന്യു പുനസംഘടന നടപ്പിലാക്കുക എന്നീ ആവശ്യങ്ങളുന്നയിച്ച് കേരള റവന്യു ഡിപ്പാര്‍ട്ട്‌മെന്റ് സ്റ്റാഫ് അസോസിയേഷന്‍ കലക്ടറേറ്റ് മാര്‍ച്ചും ധര്‍ണയും നടത്തി.
സി.പി.ഐ ജില്ലാ സെക്രട്ടറി വിജയന്‍ ചെറുകര ഉദ്ഘാടനം ചെയ്തു. കെ.ആര്‍.ഡി.എസ്.എ പ്രസിഡന്റ് കെ ഷമീര്‍ അധ്യക്ഷനായി.
സെക്രട്ടറിയേറ്റംഗം വിന്‍സെന്റ്, ജോയിന്റ് കൗണ്‍സില്‍ ജില്ലാ സെക്രട്ടറി വി.വി ആന്റണി, പ്രസിഡന്റ് എം.കെ രാമകൃഷ്ണന്‍, ജില്ലാ സെക്രട്ടറി ആര്‍ സിന്ധു, കെ.വി മനോജ്, സൂപ്പി, വിനോദ്, ജയപ്രകാശ്, സുനിമോന്‍ സംസാരിച്ചു.