തൊടുപുഴ: കരിങ്കുന്നം വടക്കുംമുറിയില്‍ ഡിവൈഎഫ്‌ഐ -സിപിഎം പ്രവര്‍ത്തകരുടെ നേതൃത്വത്തില്‍ വീടുകയറി അക്രമം. ഒരു കുടുംബത്തിലെ നാല് പേര്‍ക്ക് പരിക്കേറ്റു.
പുള്ളോലിക്കല്‍ ലക്ഷംവീട് കോളനിയിലെ കാഞ്ഞിരക്കാട്ട് മാത്യു ജോസഫ് (75), ഭാര്യ ശാന്ത, മക്കളായ ജിബിന്‍, ജിന്‍ടു എന്നിവര്‍ക്കാണ് പരിക്കേറ്റത്. ഇതില്‍ മാത്യുവിന് തലക്ക് സാരമായി പരക്കേറ്റിട്ടുണ്ട്. ജിബിനും തലയ്ക്ക് പരിക്കുകളുണ്ട്. ശനിയാഴ്ച രാത്രി 11 നാണ് സംഭവം. കമ്പിവടിയും വടിവാളുമായാണ് അക്രമികള്‍ എത്തിയത്. അമ്മയുടെയും മകളുടേയും കഴുത്തില്‍ വടിവാള് വെച്ച് കൊല്ലുമെന്ന് ഭീഷണിമുഴക്കി നിശബ്ദരാക്കിയാണ് അക്രമണം നടത്തിയത്. കോളനി നിവാസികള്‍ കൂട്ടക്കരച്ചില്‍ കേട്ട് വന്നപ്പോഴേക്കും അക്രമികള്‍ ബൈക്കുകളില്‍ രക്ഷപെട്ടു. പഴയമറ്റം പുഞ്ചിരിക്കവല നിവാസിയും ഡിവൈഎഫ്‌ഐ നേതാവുമായ അഖില്‍, കൂത്താട്ടുകുളം മണിമല സ്വദേശി ജിബിയും കണ്ടാലറിയാവുന്ന ചിലരുമാണ് അക്രമത്തിന് നേതൃത്വം നല്‍കിയതെന്നാണ് പരിക്കേറ്റവര്‍ പറയുന്നത്.
അഖില്‍ ഈ ലക്ഷംവീട് കോളനിയില്‍ അസമയങ്ങളില്‍ വന്നുപോയിരുന്നു. ഇത് നാട്ടുകാരുടെ നേതൃത്വത്തില്‍ ചോദ്യം ചെയ്തിരുന്നു. ഇതിന്റെ വൈരാഗ്യമാണ് വീടുകയറി അക്രമത്തിന് പിന്നിലെന്ന് സംശയിക്കുന്നു. പരിക്കേറ്റവര്‍ തൊടുപുഴയിലെ ജില്ലാ ആശുപത്രിയില്‍ ചികിത്സയിലാണ്.