ആലപ്പുഴ : പ്രളയത്തെ നേരിടാന്‍ കേരളത്തിലെ ജനങ്ങള്‍ക്കിടയില്‍ ഉണ്ടായ ഐക്യവും ഒരുമയും തകര്‍ക്കുന്നത്തിനു സര്‍ക്കാരിന്റെ വിസമ്മതപത്രം കാരണമായേക്കാമെന്നു എ.ഐ.സി.സി ജനറല്‍ സെക്രട്ടറി കെ.സി വേണുഗോപാല്‍ എം.പി.
പ്രളയ ദുരിതാശ്വാസത്തിന്റെ പേരില്‍ ജീവനക്കാരില്‍ നിന്നും സംസ്ഥാന സര്‍ക്കാര്‍ നടത്തുന്ന നിര്‍ബന്ധിതപണപ്പിരിവ് ഒട്ടും അഭിലഷണീയമായ ഒരു പ്രവണതയല്ല.
നാളിതുവരെ ഏതെങ്കിലും കാര്യങ്ങള്‍ക്കു ധനസമാഹരണം നടത്തുമ്പോള്‍ സര്‍ക്കാര്‍ ജീവനക്കാരില്‍ നിന്നും സമ്മതപത്രമാണ് വാങ്ങിയിരുന്നത്.എന്നാല്‍ ഇപ്പോഴത്തെ പണപ്പിരിവിന്റെ കാര്യത്തില്‍ 'വിസമ്മത പത്രം ' നല്‍കാനാണ് ജീവനക്കാരോട് ആവശ്യപ്പെട്ടിരിക്കുന്നത്. പണം നല്‍കാന്‍ തയ്യാറല്ലാത്തവര്‍ ആ കാര്യം എഴുതി നല്‍കണമെന്നു ശഠിക്കുന്നത് അതിന്റെ പേരില്‍ അവരെ ബ്ലാക്ക് മെയില്‍ ചെയ്യുന്നതിനാണ്.
പൊലിസ്, ഫയര്‍ ഫോഴ്‌സ്, തുടങ്ങിയ യൂണിഫോം വിഭാഗങ്ങളും, അധ്യാപകര്‍ റവന്യൂ അടക്കമുള്ള സിവില്‍ വിഭാഗങ്ങളും രക്ഷാപ്രവര്‍ത്തനങ്ങളിലും ദുരിതബാധിതരുടെ പുനരധിവാസത്തിനും ദിവസങ്ങളോളം രാപകല്‍ ജോലി ചെയ്തവരാണ്.അവരുടെ ഉത്സവബത്തയും രണ്ടു ദിവസത്തെ ശമ്പളവും നേരത്തെ ദുരിതാശ്വാസത്തിനായി നല്‍കിയതുമാണ്. ജീവനക്കാരെ രണ്ടുതട്ടിലാക്കുന്ന നീക്കത്തില്‍ നിന്ന് സര്‍ക്കാര്‍ പിന്തിരിയണമെന്നും എം.പി ആവശ്യപ്പെട്ടു.