കുറ്റ്യാടി: ഗ്രാമ പഞ്ചായത്തില്‍ സമ്പൂര്‍ണ പ്ലാസ്റ്റിക് നിരോധനം നിലവില്‍ വന്നെങ്കിലും കുമിഞ്ഞുകൂടുന്ന പ്ലാസ്റ്റിക് മാലിന്യങ്ങളും ഫ്‌ളക്‌സ് ബോര്‍ഡുകളും നീക്കം ചെയ്യാന്‍ നടപടിയായില്ല.
മെയ് 15 മുതലാണ് പഞ്ചായത്തില്‍ 50 മൈക്രോണിനു താഴെയുള്ള പ്ലാസ്റ്റിക് സഞ്ചികളും മറ്റും വില്‍ക്കുന്നതും കൈവശം വയ്ക്കുന്നതും നിരോധിച്ചത്. ഇതു ലംഘിക്കുന്നവരില്‍ നിന്ന് 4000 രൂപവരെ പിഴ ഈടാക്കുമെന്നും സെക്രട്ടറി ഇറക്കിയ സര്‍ക്കുലറില്‍ പറഞ്ഞിരുന്നു. കുന്നുമ്മല്‍ ബ്ലോക്കിലെ മറ്റു പഞ്ചായത്തുകളില്‍ ഏപ്രില്‍ ഒന്നിന് നിലവില്‍വന്ന പ്ലാസ്റ്റിക് നിരോധനം വന്‍ വിജയമായിരുന്നു.
എന്നാല്‍ മലയോര മേഖലയുടെ ആസ്ഥാനമായ കുറ്റ്യാടി പഞ്ചായത്തില്‍ പ്ലാസ്റ്റിക് നിരോധിക്കാത്തതിനാല്‍ ഇതിന്റെ ഗുണഫലം ലഭിച്ചിരുന്നില്ല. ഈ സാഹചര്യത്തിലാണ് കുറ്റ്യാടിയിലും പ്ലാസ്റ്റിക് നിരോധിക്കാന്‍ ഭരണസമിതി നിര്‍ബന്ധിതമായത്.
അതേസമയം പഞ്ചായത്തിന്റെ നിയന്ത്രണത്തിലുള്ള രണ്ടു ബസ് സ്റ്റാന്‍ഡുകളിലും സ്‌കൂള്‍ മതിലിലും ഫ്‌ളക്‌സ് ബോര്‍ഡുകളും പ്ലാസ്റ്റിക് സഞ്ചികളും കുമിഞ്ഞുകൂടിയിട്ടും ആരോഗ്യവകുപ്പും പഞ്ചായത്തും തിരിഞ്ഞുനോക്കുന്നില്ല. പൊതുജനാരോഗ്യ വകുപ്പിലെ ഉദ്യോഗസ്ഥരുടെ ഓഫിസിന് തൊട്ടടുത്താണ് ആശുപത്രിയില്‍ നിന്നുള്ള പ്ലാസ്റ്റിക്കുകളും മറ്റും കത്തിക്കുന്നത്. ഇതേ സ്ഥലത്തുതന്നെ കച്ചവട സ്ഥാപനത്തില്‍ നിന്നുള്ള സൈക്കിള്‍ ടയറുകളും മറ്റു പാഴ്‌വസ്തുക്കളും നിക്ഷേപിച്ചിട്ടുണ്ട്.
മഴക്കാലപൂര്‍വ ശുചീകരണത്തിന് നടപടികളില്ലാത്തതിനാല്‍ കൊതുക് ശല്യവും രൂക്ഷമാണ്. പുഴയോരത്തും ഓവുചാലുകളിലും കുമിഞ്ഞുകൂടിയ മാലിന്യങ്ങള്‍ മഴ ശക്തമാകുന്നതോടെ കുത്തിയൊലിച്ച് ഇറങ്ങുക കുറ്റ്യാടിപ്പുഴയിലേക്കാണ്.
അറവുമാലിന്യങ്ങളടക്കം തള്ളി പുഴ മലിനീകരിക്കുന്നതിനെതിരേ നടപടിയെടുക്കാന്‍ പുഴ സംരക്ഷണസമിതിയോ പഞ്ചായത്തോ പൊതുജനാരോഗ്യ വിഭാഗമോ തയാറാകുന്നില്ലെന്ന് നാട്ടുകാര്‍ പറയുന്നു. കാലവര്‍ഷം ശക്തമാകുന്നതിനു മുന്‍പ് ശുചീകരണ പ്രവര്‍ത്തനങ്ങള്‍ കാര്യക്ഷമമാക്കിയില്ലെങ്കില്‍ രോഗങ്ങള്‍ പടരുമെന്ന് ആരോഗ്യരംഗത്തെ വിദഗ്ധര്‍ പറയുന്നു.