മലപ്പുറം: പ്ലസ്‌വണ്‍ സ്‌പോര്‍ട്‌സ് ക്വാട്ട പ്രവേശനം രണ്ടു ഘട്ടമായി നടപ്പാക്കും. ഒന്നാംഘട്ടത്തില്‍ സ്‌പോര്‍ട്‌സില്‍ മികവ് നേടിയ വിദ്യാര്‍ഥികള്‍ അവരുടെ 2015 ഏപ്രില്‍ മുതല്‍ 2017 മാര്‍ച്ച് വരെയുള്ള സ്‌പോര്‍ട്‌സ് സര്‍ട്ടിഫിക്കറ്റുകള്‍ ഓണ്‍ലൈനായി രജിസ്റ്റര്‍ ചെയ്തു കായിക നേട്ടങ്ങള്‍ ചേര്‍ത്ത് ഫൈനല്‍ സബ്മിഷന്‍ കൊടുത്തശേഷം ലഭിക്കുന്ന രജിസ്‌ട്രേഷന്‍ സ്ലിപ്പ് കായിക നേട്ടങ്ങള്‍ തെളിയിക്കുന്ന സര്‍ട്ടിഫിക്കറ്റുകളുടെ അസ്സല്‍, ഫോട്ടോകോപ്പി എന്നിവയുമായി ജില്ലാ സ്‌പോര്‍ട്‌സ് കൗണ്‍സിലില്‍ വെരിഫിക്കേഷന് എത്തണം.
സ്‌പോര്‍ട്‌സ് ക്വാട്ട സര്‍ട്ടിഫിക്കറ്റ് വെരിഫിക്കേഷന്‍ ഇന്നു മുതല്‍ ജില്ലാ സ്‌പോര്‍ട്‌സ് കൗണ്‍സിലില്‍ ആരംഭിക്കും. ജില്ലാ സ്‌പോര്‍ട്‌സ് കൗണ്‍സിലില്‍നിന്നു ലഭിക്കുന്ന സ്‌പോര്‍ട്‌സ് ക്വാട്ട സ്‌കോര്‍ കാര്‍ഡ് നമ്പര്‍ 19 മുതല്‍ 30വരെ ഹയര്‍സെക്കന്‍ഡറി വെബ്‌സൈറ്റില്‍ രണ്ടാംഘട്ടമായി  സമര്‍പ്പിക്കണം. അപേക്ഷയില്‍ താല്‍പര്യമുള്ള സ്‌കൂള്‍ കോഴ്‌സുകള്‍ ഓപ്ഷനായി നല്‍കണം.
സ്‌പോര്‍ട്‌സ് ഹോസ്റ്റലില്‍ പ്രവേശനം ലഭിച്ച വിദ്യാര്‍ഥികള്‍ നിര്‍ബന്ധമായും ജനറല്‍ പ്രവേശനത്തിനും സ്‌പോര്‍ട്‌സ് ക്വാട്ടയിലും അപേക്ഷിക്കണം. അപേക്ഷകള്‍ ഓണ്‍ലൈനായി സമര്‍പ്പിച്ച ശേഷം പ്രിന്റൗട്ടിന്റെ പകര്‍പ്പില്‍ നിര്‍ദിഷ്ട സ്ഥാനത്തു വിദ്യാര്‍ഥിയും രക്ഷിതാവും ഒപ്പുവച്ചു സ്വയം സാക്ഷ്യപ്പെടുത്തിയ അനുബന്ധ രേഖകളും സഹിതം ബന്ധപ്പെട്ട ജില്ലയിലെ നിര്‍ദിഷ്ട ഹയര്‍സെക്കന്‍ഡറി പ്രിന്‍സിപ്പലിനു സമര്‍പ്പിക്കണം.