പാലക്കാട്: കുടുംബശ്രീയുടെ 19ാം വാര്‍ഷികാഘോഷങ്ങളുടെ ഭാഗമായി ആദ്യദിനം നടന്ന കായികമത്സരത്തില്‍ 20 പോയിന്റോടെ കിഴക്കഞ്ചേരി സി.ഡി.എസ് ഒന്നാമതായി.
13 പോയിന്റോടെ മരുതറോഡും 12 പോയിന്റോടെ തെങ്കര സി.ഡി.എസ് ക്രമേണ രണ്ടും മൂന്നും സ്ഥാനം നേടി. മങ്കര സി.ഡി.എസിലെ സുവര്‍ണയെ കായിക പ്രതിഭയായി തിരഞ്ഞെടുത്തു.
സമ്മാനദാനം കുഞ്ചന്‍ സ്മാരക സമിതി സെക്രട്ടറി എ.കെ ചന്ദ്രന്‍കുട്ടി നിര്‍വഹിച്ചു. സര്‍ട്ടിഫിക്കറ്റും മെമന്റോയുമടങ്ങുന്നതാണ് പാരിതോഷികം. ഓട്ടം, റിലേ, ലോങ്ജംബ്, നടത്തം, വടംവലി, ഷോട്ട് പുട്ട് കായികമത്സരയിനങ്ങളില്‍ 300ഓളം പേരാണ് പങ്കെടുത്തത്.
കായികോത്സവം വിക്‌ടോറിയ കോളജ് ഗ്രൗണ്ടില്‍ ജില്ലാ സ്‌പോര്‍ട്‌സ് കൗണ്‍സില്‍ പ്രസിഡന്റ് ടി.എന്‍. കണ്ടമുത്തന്‍ ഉദ്ഘാടനം ചെയ്തു. ജില്ലാ പഞ്ചായത്ത് ആരോഗ്യ -വിദ്യാഭ്യാസ സ്റ്റാന്‍ഡിങ് കമ്മിറ്റി ചെയര്‍പേഴ്‌സണ്‍ കെ. ബിനുമോള്‍ അധ്യക്ഷയായി. ജില്ലാ പഞ്ചായത്ത് പ്രസിഡന്റ് കെ. ശാന്തകുമാരി മുഖ്യാതിഥിയായി. ജില്ലാ മിഷന്‍ കോഡിനേറ്റര്‍ പി.സെയ്തലവി, അസി. കോഡിനേറ്റര്‍ ഹാരിഫ ബീഗം പങ്കെടുത്തു.
ജില്ലാ തല മത്സരവിജയികള്‍ക്ക് സംസ്ഥാനതലത്തിലും മത്സരിക്കാം.