തിരുവനന്തപുരം: ലളിതകലാ അക്കാദമിയുടെ കാര്‍ട്ടൂണ്‍ പുരസ്‌കാരം വിവാദമായതിനെ തുടര്‍ന്ന് പുനഃപരിശോധിക്കാന്‍ നിര്‍ദേശം നല്‍കിയതായി മന്ത്രി എ.കെ ബാലന്‍.
വിവാദ കാര്‍ട്ടൂണിന് അവാര്‍ഡ് നല്‍കിയ ലളിതകലാ അക്കാദമിയുടെ തീരുമാനം പുനഃപരിശോധിക്കണമെന്ന് ആവശ്യപ്പെട്ട് പ്രതിപക്ഷ നേതാവ് രമേശ് ചെന്നിത്തല ഉന്നയിച്ച സബ്മിഷനുള്ള മറുപടിയിലാണ് മന്ത്രി സര്‍ക്കാര്‍ നിലപാട് വ്യക്തമാക്കിയത്. മതവികാരങ്ങള്‍ വൃണപ്പെടുത്തുന്നത് രാജ്യത്തിന്റെ അടിസ്ഥാനശിലയായ മതേതരത്വത്തിന് ഭംഗം വരുത്തുമെന്ന് പ്രതിപക്ഷ നേതാവ് നിയമസഭയില്‍ ചൂണ്ടിക്കാട്ടി.
ലളിതകലാ അക്കാദമിയുടെ കാര്‍ട്ടൂണ്‍ പുരസ്‌കാരം ലഭിച്ച കെ.കെ സുഭാഷിന്റെ 'വിശ്വാസം രക്ഷതി' എന്ന കാര്‍ട്ടൂണിനെ സംബന്ധിച്ച് വിമര്‍ശനങ്ങള്‍ ഉയര്‍ന്നുവന്നത് സര്‍ക്കാരിന്റെ ശ്രദ്ധയില്‍പ്പെട്ടിട്ടുണ്ടെന്ന് മന്ത്രി പറഞ്ഞു. ഒരു പ്രത്യേക മതത്തിന്റെ പ്രതീകങ്ങളെ അവഹേളിക്കുന്ന രീതിയിലും പ്രകോപനപരവുമായാണ് കാര്‍ട്ടൂണ്‍ ചിത്രീകരിച്ചിട്ടുള്ളതെന്നാണ് ആക്ഷേപം. ബിഷപ്പ് ഫ്രാങ്കോ മുളയ്ക്കലുമായി ബന്ധപ്പെട്ട വിഷയമാണ് കാര്‍ട്ടൂണിന്റെ പ്രമേയം.
അത്തരം ഒരു പ്രമേയത്തെ അധികരിച്ച് രചന നിര്‍വഹിക്കുന്നതിനുള്ള ആവിഷ്‌കാര സ്വാതന്ത്ര്യത്തില്‍ സര്‍ക്കാര്‍ ഇടപെടുന്നില്ല. എന്നാല്‍, ക്രിസ്തീയ മതാചാരപ്രകാരമുള്ള ചില മതചിഹ്നങ്ങളെ അധിക്ഷേപകരമായി ചിത്രീകരിക്കുന്ന ചില ഭാഗങ്ങള്‍ കാര്‍ട്ടൂണിലുണ്ട്. ഇതിനോട് സര്‍ക്കാര്‍ യോജിക്കുന്നില്ല. ഒരു മതത്തിന്റെയും വിശ്വാസങ്ങളെ ഹനിക്കുകയോ അപകീര്‍ത്തിപ്പെടുത്തുകയോ ചെയ്യുന്ന പ്രവര്‍ത്തനങ്ങളുമായി മുന്നോട്ടുപോകാന്‍ സര്‍ക്കാര്‍ ഉദ്ദേശിക്കുന്നില്ല. അത്തരം നീക്കങ്ങള്‍ ഏതുഭാഗത്തുനിന്നുണ്ടായാലും സര്‍ക്കാര്‍ അതിനോടൊപ്പമുണ്ടാകില്ലെന്ന് മന്ത്രി മറുപടി പറഞ്ഞു.
സംസ്ഥാന സര്‍ക്കാരിന് കീഴിലെ അക്കാദമികള്‍ സ്വതന്ത്രമായ രീതിയിലാണ് പ്രവര്‍ത്തിച്ചുവരുന്നത്. അവരുടെ ആഭ്യന്തര കാര്യങ്ങളില്‍ ഒരുവിധത്തിലുള്ള ഇടപെടലുകളും സര്‍ക്കാര്‍ നടത്താറില്ല.
അവാര്‍ഡ് നിര്‍ണയംപോലെയുള്ള സുപ്രധാനമായ പരിപാടികളും ബന്ധപ്പെട്ട സ്ഥാപനങ്ങള്‍ നിക്ഷ്പക്ഷവും സുതാര്യവുമായാണ് നടത്തിവരുന്നത്. ഫ്രാങ്കോ മുളയ്ക്കലിന് എതിരായ കാര്‍ട്ടൂണിലെ പ്രമേയത്തെ അംഗീകരിക്കുമ്പോഴും മതചിഹ്നങ്ങളെ അപകീര്‍ത്തികരമായി ചിത്രീകരിച്ചത് സര്‍ക്കാര്‍ ഗൗരവത്തില്‍ കാണുകയാണെന്നും മന്ത്രി കൂട്ടിച്ചേര്‍ത്തു.