ശ്രീകൃഷ്ണപുരം: കാലങ്ങളായി തകര്‍ന്ന് കിടന്നിരുന്ന കരിമ്പുഴ ഗ്രാമപഞ്ചായത്തിലെ ആറ്റാശ്ശേരി പതിനേഴാം ചാഴിയോട് രാജ്യസഭ എം.പി പി.വി അബുല്‍ വഹാബിന്റെ 2016 -17 വര്‍ഷത്തെ റോഡ് വികസന ഫണ്ടും, കരിമ്പുഴ ഗ്രാമപഞ്ചായത്ത് ഫണ്ടും ഉള്‍പ്പെടുത്തി 21.28 ലക്ഷം രൂപ ചിലവഴിച്ച് ചാഴിയോട് ജുമാമസ്ജിദ് റോഡ്, പനാംകുന്ന്-മഞ്ഞക്കുളമ്പ് റോഡ്, പനാംകുന്ന് - ചോളോട് റോഡ്, ചാഴിയോട്-ചാണക്കുന്ന് റോഡ്, കിഴക്കുംപുറം- വി.പി കോളനി റോഡുകള്‍ ജനങ്ങള്‍ക്ക് തുറന്ന് കൊടുത്തു. രണ്ട് പതിറ്റാണ്ടായി റോഡുകള്‍ ഗതാഗത യോഗ്യമല്ലാത്ത രീതിയില്‍ തകര്‍ന്ന് കിടക്കുകയായിരുന്നു.
മഴക്കാലമായാല്‍ കാല്‍നട യാത്രക്ക് പോലും കഴിയാതെ കാലങ്ങളായി പ്രയാസം അനുഭവിക്കുന്ന ചാഴിയോട്, ചോളോട്, മഞ്ഞക്കുളമ്പ് പ്രദേശ നിവാസികള്‍ക്ക് ചെറിയ തോതിലെങ്കിലും ആശ്വാസകരമാണ് ഈ നിര്‍മ്മാണ പ്രവര്‍ത്തികള്‍. ഇവിടുത്തെ റോഡുകളുടെ ശോചനീയാവസ്ഥയെക്കുറിച്ച് സുപ്രഭാതം നേരത്തെ റിപ്പോര്‍ട്ട് ചെയ്തിരുന്നു. കഴിഞ്ഞ യു.ഡി.എഫ് സര്‍ക്കാറിന്റെ കാലത്ത് എറ്റെടുത്ത നാട്ടുകല്‍- കടമ്പഴിപ്പുറം റോഡില്‍ മുറിയംങ്കണ്ണി, ചീരത്തടം, പനാംകുന്ന്, ആറ്റാശ്ശേരി, കരിപ്പമണ്ണ, കരിമ്പുഴ വരെയുള്ള റോഡുകള്‍ക്ക് പതിനേഴ് ലക്ഷം രൂപയുടെ മെയിന്റനന്‍സ് വര്‍ക്കുകള്‍ നടത്തുന്നതിനും, തകര്‍ന്ന് കിടന്നിരുന്ന കിഴക്കുംപുറം റോഡിന് വെള്ളപൊക്ക ദുരിതാശ്വാസ ഫണ്ടില്‍നിന്ന് ഏഴ് ലക്ഷം രൂപ ചിലവഴിച്ചും പണികള്‍ പൂര്‍ത്തിയാക്കാനും സാധിച്ചു.
കാലങ്ങളായി വാര്‍ഡില്‍ നിലനിന്നിരുന്ന വികസന മുരടിപ്പിന് അറുതി വരുത്തി വികസന പ്രവര്‍ത്തികള്‍ക്ക് തുടക്കം കുറിച്ചതിന്റെ സന്തോഷത്തിലാണ് നാട്ടുകാര്‍. വാര്‍ഡ് മെമ്പര്‍ പി.എ. തങ്ങള്‍ റോഡുകളുടെ ഉദ്ഘാടനം നിര്‍വഹിച്ചു. തുടര്‍ന്ന് നടന്ന പൊതുസമ്മേളനതില്‍ മെമ്പര്‍ കെ. രാധാകൃഷ്ണന്‍ അധ്യക്ഷനായി. ഇ.കെ. സമദ് മാസ്റ്റര്‍, കെ. മൊയ്തുപ്പ, എന്‍ ഹംസ പ്രസംഗിച്ചു. കെ മാമുണ്ണി ഹാജി, ടി.വിരാന്‍ കുട്ടി ഹാജി, എം. രാധ, എന്‍. മുജീബ്, വി.കെ. ഹംസ, കെ. കുഞ്ഞാപ്പു, കെ.എച്ച് കബീര്‍, കെ. സക്കീര്‍ വി.കെ അബൂബക്കര്‍, ടി.നാസര്‍, സി.പി സലിം, ആസിഫ്, മന്‍സൂര്‍, ഷൂക്കൂര്‍, ഫായിസ്, ബഷീര്‍, യു. മൊയതുപ്പ, നാസര്‍, അലി ഷാജഹാന്‍, അയ്യൂമ്പ് നേതൃത്യം നല്‍കി.