കൊച്ചി: പെണ്‍കുട്ടിയെ ലൈംഗികമായി പീഡിപ്പിച്ച കേസില്‍ സംഘ്പരിവാറിന്റെ നേതൃത്വത്തിലുള്ള ജനം ടി.വി ചാനല്‍ ഡിസ്ട്രിബ്യൂഷന്‍ മേധാവി ശ്രീകുമാറിനെതിരേ പൊലിസ് കേസെടുത്തു. നെടുമ്പാശേരി വിമാനത്താവളത്തിനു സമീപത്തെ സ്വകാര്യ ഫ്‌ളാറ്റിലെ ജീവനക്കാരിയുടെ പരാതിയുടെ അടിസ്ഥാനത്തിലാണ്  കേസ്.
സംഘ്പരിവാര്‍ നേതൃത്വത്തില്‍ ആരംഭിച്ച ചാനലിന്റെ സി.ഇ.ഒ എന്ന് പരിചയപ്പെടുത്തിയാണ് ഫ്‌ളാറ്റില്‍ ഇയാള്‍ താമസിച്ചിരുന്നത്. ഫ്‌ളാറ്റിലെ താമസക്കാരുടെ അസോസിയേഷന്റെ പ്രസിഡന്റ് കൂടിയാണ് ഇയാള്‍. കഴിഞ്ഞ അഞ്ചിനായിരുന്നു സംഭവം. പാലക്കാട്ടെ നിര്‍ധനകുടുംബത്തിലെ അംഗമായ പെണ്‍കുട്ടി ജോലി നഷ്ടപ്പെടുമെന്ന ഭയത്താല്‍ സംഭവം പുറത്തു പറഞ്ഞില്ല.
സംഭവത്തിനുശേഷം പെണ്‍കുട്ടി നാട്ടിലേക്കുപോയി. തിങ്കളാഴ്ച ഉച്ചയോടെ അമ്മയോടൊപ്പം സ്റ്റേഷനില്‍ നേരിട്ടെത്തി പരാതി നല്‍കുകയായിരുന്നു. തന്നെ ശ്രീകുമാര്‍ പീഡിപ്പിക്കുകയായിരുന്നുവെന്ന് പെണ്‍കുട്ടിയുടെ പരാതിയില്‍ പറയുന്നു.
നെടുമ്പാശേരി വിമാനത്താവളത്തില്‍  ഗ്രൗണ്ട് ഹാന്‍ഡിലിങ് വിഭാഗത്തില്‍ ഇന്റര്‍വ്യു കഴിഞ്ഞ് ജോലി പ്രതീക്ഷിച്ചിരിക്കുന്നതിനിടെ പെണ്‍കുട്ടിക്കു ഫ്‌ളാറ്റില്‍ ഫ്‌ളോര്‍ മാനേജരായി ജോലി ലഭിച്ചു. നെടുമ്പാശേരി തുരുത്തിശേരി സ്വദേശിയായ ശ്രീകുമാറും ഇതേ ഫ്‌ളാറ്റിലെ താമസക്കാരനാണ്. പെണ്‍കുട്ടിയെ നേരത്തെ രണ്ടുപ്രാവശ്യം ഇയാള്‍ കീഴ്‌പ്പെടുത്താന്‍ ശ്രമിച്ചിരുന്നു.
കഴിഞ്ഞ അഞ്ചിനു മുറിയില്‍ വിളിച്ചുവരുത്തി വാതില്‍ അകത്തുനിന്ന് പൂട്ടിയശേഷം പീഡിപ്പിക്കുകയായിരുന്നുവെന്നും  പരാതിയില്‍ പറയുന്നു.
പുറത്തുപറഞ്ഞാല്‍ അപായപ്പെടുത്തുമെന്ന് ഭീഷണിപ്പെടുത്തുകയും ചെയ്തു. തുടര്‍ന്നാണ്   നാട്ടിലേക്കുപോയത്. പെണ്‍കുട്ടിയുടെ മൊഴി രേഖപ്പെടുത്തി അന്വേഷണം ആരംഭിച്ചപ്പോള്‍ ഇയാള്‍ മുങ്ങുകയായിരുന്നു.