പറവട്ടാനി: ഫോറസ്റ്റ് ഓഫീസില്‍ പത്ത് മലമ്പാമ്പ് കുഞ്ഞുങ്ങള്‍ പിറന്നു. കഴിഞ്ഞമാസം കണ്ടശാംകടവിലെ സ്വകാര്യ വ്യക്തിയുടെ പറമ്പില്‍ നിന്നു വന്യജീവി സംരക്ഷകനായ ജോജു മുക്കാട്ടുകരയുടെ നേതൃത്വത്തിലുള്ള ഫോറസ്റ്റ് ഉദ്യോഗസ്ഥരാണ് മലമ്പാമ്പിനേയും 17 മുട്ടകളും പറവട്ടാനി ഫോറസ്റ്റ് ഓഫീസിലെത്തിച്ചത്. പാമ്പിനെ അന്ന് തന്നെ പീച്ചി വനത്തില്‍ വിട്ടിരുന്നു. പ്രത്യേകം തയ്യാറാക്കിയ കൂട്ടില്‍ കൃത്രിമമായി സജ്ജമാക്കിയ ഇന്‍കുബേറ്റര്‍ സംവിധാനത്തില്‍ അടയിരുത്തിയാണ് മുട്ടകള്‍ വിരിയിച്ചത്. കാലാവസ്ഥാ വ്യതിയാനവും മറ്റും കാരണം 17 ല്‍ 10 മുട്ടകള്‍ മാത്രമാണ് വിരിഞ്ഞത്. പിറന്ന പത്ത് മലമ്പാമ്പ് കുഞ്ഞുങ്ങളും ആരോഗ്യം ആര്‍ജിച്ചതോടെ വനപാലകര്‍ ഇവയെയും പീച്ചി വനത്തില്‍ കൊണ്ടുവിട്ടു.