തൃശൂര്‍: ജില്ലാ ടെന്നികോയ്റ്റ് അസോസിയേഷന്റെ ആഭിമുഖ്യത്തില്‍ 19, 20, 21 തീയതികളില്‍ വി.കെ.എം മേനോന്‍ ഇന്‍ഡോര്‍ സ്‌റ്റേഡിയത്തില്‍ 32-ാമത് സംസ്ഥാന സബ് ജൂനിയര്‍ ടെന്നികോയ്റ്റ് ചാംപ്യന്‍ഷിപ്പ് നടത്തുമെന്ന് ഭാരവാഹികള്‍ പത്രസമ്മേളനത്തില്‍ അറിയിച്ചു. 14 ജില്ലകളില്‍ നിന്നും ആണ്‍കുട്ടികളും പെണ്‍കുട്ടികളും അടക്കം 280 ഓളം കളിക്കാരും 50 ഒഫീഷ്യല്‍സും പങ്കെടുക്കും. 20ന് രാവിലെ നാല് ഫല്‍ഡ്‌ലൈറ്റ് സ്റ്റേഡിയത്തില്‍ മത്സരം ആരംഭിക്കും. ടീം ചാമ്പ്യന്ഷിപ്പ് മത്സരങ്ങള്‍ ലീഗ് നോക്കൗട്ട് അടിസ്ഥാനത്തിലായിരിക്കും. സിംഗിള്‍സ്, ഡബിള്‍സ്, മിക്‌സഡ് ഡബിള്‍സ് എന്നീ വ്യക്തിഗത മത്സരങ്ങള്‍ നോക്കൗട്ട് അടിസ്ഥാനത്തിലും നടക്കും. ഈ വര്‍ഷം കോട്ടയത്തു നടക്കുന്ന ദേശീയ ചാംപ്യന്‍ഷിപ്പില്‍ പങ്കെടുക്കുന്നതിനുള്ള കേരള ടീമിനെ ഈ മത്സരത്തില്‍ നിന്നും തെരഞ്ഞടുക്കും. 20ന് രാവിലെ 10ന് ചാംപ്യന്‍ഷിപ്പ് മേയര്‍ അജിത ജയരാജന്‍ ഉദ്ഘാടനം ചെയ്യും. കെ.എസ് ബാബു അധ്യക്ഷനാകും. ജില്ലാ സ്‌പോര്‍ട്‌സ് കൗണ്‍സില്‍ വിന്‍സെന്റ് കാട്ടൂക്കാരന്‍, നടി അപര്‍ണ ബാലമുരളി വിശിഷ്ടാതിഥികളായിരിക്കും. 21ന് വൈകിട്ട് നാലിന് സമാപനസമ്മേളനം ഉദ്ഘാടനവും സമ്മാനദാനവും മന്ത്രി വി.എസ് സുനില്‍കുമാര്‍ നിര്‍വഹിക്കും. ബിന്നി ഇമ്മട്ടി അധ്യക്ഷനാകും. ബിന്നി ഇമ്മട്ടി, ടി.ജി മോഹന്‍, ടി.ടി ജെയിംസ്, കെ.എം ലെനിന്‍, ക്ലിന്റോ ജസ്റ്റിന്‍ പത്രസമ്മേളനത്തില്‍ പങ്കെടുത്തു.