വെങ്കിടങ്ങ്: വൈദ്യുതി ബില്‍ ഓണ്‍ലൈനായി അടച്ച ഉപഭോക്താവ് വെട്ടിലായി. 1.05.2017 ന് ഓണ്‍ലൈനായി അടച്ച തുക ഇപ്പോഴും വൈദ്യുതി ബോര്‍ഡിന്റെ കണക്കില്‍ വരവ് വന്നിട്ടില്ലാത്തതാണ് വെങ്കിടങ്ങ് സ്വദേശിക്ക് ദുരനുഭവമായത്.
വൈദ്യുതി കണക്ഷന്‍ വിച്ഛേദിക്കാന്‍ വൈദ്യുതി ബോര്‍ഡ് ജീവനക്കാര്‍ എത്തിയപ്പോഴാണ് ഉപഭോക്താവ് വിവരം അറിയുന്നത്.
വൈദ്യുതി സെക്ഷനില്‍ ചെന്ന് ഉപഭോക്താവ് ബാങ്ക് പാസ്ബുക്കില്‍ വൈദ്യുതി ബോര്‍ഡിന് കൈമാറിയ രേഖ സഹിതം പാസ് ബുക്കിന്റെ കോപ്പി നല്‍കിയെങ്കിലും അവരുടെ അക്കൗണ്ടില്‍ സംഖ്യ വരാതെ വൈദ്യുതി വിച്ഛേദിക്കുന്നത് തടയാന്‍ കഴിയില്ല എന്ന് ബോര്‍ഡ് അധികാരികള്‍ അറിയിച്ചതോടെ ഉപഭോക്താവ് വീണ്ടും ബില്‍തുക അടച്ച് വൈദ്യുതി കട്ട് ചെയ്യുന്നത് ഒഴിവാക്കി.
കുറച്ചുകാലമായി ഇതുപോലുള്ള സംഭവങ്ങള്‍ ആവര്‍ത്തിക്കുന്നതായി വൈദ്യുതി ബോര്‍ഡ് വെങ്കിടങ്ങ് വൈദ്യുതി സെക്ഷന്‍ അസിസ്റ്റന്റ് എന്‍ജിനീയര്‍ പറഞ്ഞു.
ഇത്തരം സംഭവങ്ങള്‍ പൊതുജനത്തെ ഓണ്‍ലൈന്‍ ആയി വൈദ്യുതി അടക്കുന്നതില്‍ നിന്ന് താത്പര്യം നഷ്ടപ്പെടുത്തുന്നുമെന്ന് അദ്ദേഹം പറഞ്ഞു.