പയ്യന്നൂര്‍: ആര്‍.എസ്.എസ് നേതാവ് കക്കംപാറയിലെ ചൂരക്കാട്ട് ബിജുവിനെ കൊലപ്പെടുത്തിയത് സി.പി.എം പ്രവര്‍ത്തകര്‍ ഗൂഢാലോചന നടത്തിയാണെന്നു പൊലിസ്. സംഭവവുമായി ബന്ധപ്പെട്ട് ഒരുമാസത്തോളം ഗൂഢാലോചന നടന്നിട്ടുണ്ടെന്നും ജുഡീഷ്യല്‍ ഒന്നാംക്ലാസ് കോടതിയില്‍ സമര്‍പ്പിച്ച റിമാന്‍ഡ് റിപ്പോര്‍ട്ടില്‍ പൊലിസ് വ്യക്തമാക്കി.
പതിനേഴോളം കേസിലെ പ്രതിയായ ബിജു, കൊല്ലപ്പെട്ട സി.പി.എം പ്രവര്‍ത്തകന്‍ കുന്നരു കാരന്താട്ടെ സി.വി ധനരാജ് വധക്കേസില്‍ പ്രതിയാണ്. ധനരാജിനെ കൊന്നതിലുള്ള വിരോധത്തിലാണു ബിജുവിനെ കൊലപ്പെടുത്തിയതെന്നും കേസില്‍ ഏഴു പ്രതികളാണുള്ളതെന്നും പൊലിസ് വ്യക്തമാക്കി. പ്രതികളെ കൂടുതല്‍ ചോദ്യം ചെയ്യേണ്ടതുണ്ടെന്നും ഇന്നലെ കോടതിയില്‍ സമര്‍പ്പിച്ച റിപ്പോര്‍ട്ടില്‍ പറയുന്നു.
അതസമയം സംഭവത്തില്‍  തിങ്കളാഴ്ച അറസ്റ്റിലായ കക്കംപാറയിലെ നടുവിലെ പുരയില്‍ റിനീഷ് (28), പരുത്തിക്കാട്ടെ ജ്യോതിഷ് (26) എന്നിവരെ പയ്യന്നൂര്‍ ഒന്നാംക്ലാസ് മജിസ്‌ട്രേറ്റ് റിമാന്‍ഡ് ചെയ്തു. കേസില്‍ പിടിയിലാകാന്‍ ബാക്കിയുള്ളവര്‍ കീഴടങ്ങാനുള്ള സാധ്യതയുണ്ടെന്നു പൊലിസിനു സൂചന ലഭിച്ചു.
കൊലപാതകത്തില്‍ ഏഴുപേര്‍ക്കെതിരേയാണു കേസെടുത്തത്. ഇതില്‍ കൃത്യത്തില്‍ നേരിട്ടു പങ്കെടുത്ത നാലുപേരും സഹായിയായ ഒരാളുമാണ് ഇനി പിടിയിലാകാനുള്ളത്.
സംഭവത്തില്‍ പാര്‍ട്ടി പ്രവര്‍ത്തകര്‍ ഉണ്ടെങ്കില്‍ നടപടിയുണ്ടാകുമെന്നു സി.പി.എം നേതൃത്വം വ്യക്തമാക്കിയ സാഹചര്യത്തിലാണു പ്രതികള്‍ കീഴടങ്ങാനുള്ള സാധ്യത പൊലിസ് കണക്കുകൂട്ടുന്നത്. അതേസമയം ബാക്കിയുള്ള പ്രതികള്‍ക്കായി കഴിഞ്ഞദിവസം രാത്രിയിലും ഇന്നലെയും കക്കംപാറ, രാമന്തളി ഭാഗങ്ങളില്‍ പൊലിസ് റെയ്ഡ് നടത്തി.
പരിശോധനയില്‍ കുന്നരു കാരന്താട്ട് ബസ്‌റ്റോപ്പിനു സമീപം നിര്‍ത്തിയിട്ട നിലയില്‍ അഞ്ചു ബൈക്കുകള്‍ പൊലിസ് കസ്റ്റഡിയിലെടുത്തു. ഇതു  പ്രതികള്‍ ഉപയോഗിച്ചതാകാമെന്നാണു പൊലിസ് നിഗമനം.