തൃശൂര്‍: ജലസംരക്ഷണത്തിന് സമൂഹബോധവല്‍ക്കരണം ആവശ്യമാണെന്ന് ജില്ലാ പഞ്ചായത്ത് പ്രസിഡന്റ് മേരി തോമസ് പറഞ്ഞു. ജലരക്ഷ-ജീവരക്ഷ ടാസ്‌ക് ഫോഴ്‌സ് യോഗം കലക്ടറേറ്റില്‍ ഉദ്ഘാടനം ചെയ്തു സംസാരിക്കുകയായിരുന്നു ജില്ലാ പഞ്ചായത്ത് പ്രസിഡന്റ്. ബ്ലു ആര്‍മിയുടെ പ്രവര്‍ത്തനവും സമൂഹാവബോധവും കൂടിചേരുമ്പാള്‍ ജലരക്ഷ-ജീവരക്ഷ പദ്ധതിയെ കൂടുതല്‍ മുന്നോട്ടു കൊണ്ടുപോകാന്‍ കഴിയും.
ഇതൊരു മാതൃക പദ്ധതിയായി മാറ്റാനും സാധിക്കും. ഇപ്പോള്‍ തന്നെ 50ഓളം സ്‌കൂളുകളില്‍ ബ്ലൂ ആര്‍മി ടാസ്‌ക് ഫോഴ്‌സിനെ വിന്യസിപ്പിക്കാനായിട്ടുണ്ട്. ജില്ലയിലെ എല്ലാ സ്‌കൂളുകളിലും വിന്യസിപ്പിച്ച് കാര്യക്ഷമമാക്കണം. നബാര്‍ഡ്, കൃഷി വകുപ്പ് തുടങ്ങിയ എല്ലാ വകുപ്പുകളുടെയും ഫണ്ടും എം.എല്‍.എമാരുടെയും എം.പിമാരുടെയും ഫണ്ടും ചേര്‍ന്ന് ഈ പദ്ധതിയെ മുന്നോട്ടു കൊണ്ടു പോകും. ഇതിനായി 50 ലക്ഷം രൂപ ജില്ലാ പഞ്ചായത്ത് മാറ്റി വച്ചിട്ടുണ്ട്. തദ്ദേശസ്വയംഭരണസ്ഥാപനങ്ങള്‍ അഞ്ചു ലക്ഷം രൂപ ഇതിലേക്ക് മാറ്റി നല്‍കണമെന്നും ജില്ലാ പഞ്ചായത്ത് പ്രസിഡന്റ് അറിയിച്ചു.
643 കോടി രൂപയാണ് പദ്ധതിക്കുളളത്. ഇപ്പോള്‍ 11 പദ്ധതികള്‍ ഏറ്റെടുത്തുകഴിഞ്ഞു. കനോലികനാല്‍ നവീകരണം ജില്ലയിലെ പുഴകളുടെ വീണ്ടെടുപ്പ്, ജലസ്രോതസ്, കുളം, തോട് എന്നിവയുടെ ശുദ്ധീകരണം തുടങ്ങിയവയാണ് പദ്ധതിയിലുള്ളതെന്നും അവര്‍ പറഞ്ഞു.
ജില്ലാ കലക്ടര്‍ ടി.വി അനുപമ അദ്ധ്യക്ഷയായി. ബ്ലു ആര്‍മിയുടെ ടാസ്‌ക് എന്തെന്ന് ഓരോ വകുപ്പും കൃത്യമായി തിരിച്ചറിഞ്ഞു നല്‍കണം. സ്‌കൂളിലും ഈ കോഡിനേഷന്‍ നടക്കണം. ജനകീയ സമിതി രൂപീകരണവും പൂര്‍ത്തിയാക്കണം. ജനകീയ സമിതിക്കുള്ള പരിശീലനം കിലയില്‍ സെപ്റ്റംബര്‍ 24ന് നടക്കുമെന്നും ജില്ലാ കലക്ടര്‍ അറിയിച്ചു.യോഗത്തില്‍ ജില്ലാ പഞ്ചായത്ത് വികസനകാര്യ സ്റ്റാന്‍ഡിങ്ങ് കമ്മിറ്റി ചെയര്‍പേഴ്‌സണ്‍ ജെന്നി ജോസ്ഫ്, മണ്ണുസംരക്ഷണ ഓഫിസര്‍ സിന്ധു പി.ഡി, ജില്ലാ പ്ലാനിങ്ങ് ഓഫിസര്‍ ഡോ. എം. സുരേഷ് കുമാര്‍ തുടങ്ങിയവര്‍ പങ്കെടുത്തു.