ബ്രസീലിയ: കോപാ അമേരിക്കയില്‍ ഇന്ന് നിലവിലെ ചാംപ്യന്‍മാരായ ചിലിയും ഏഷ്യന്‍ ശക്തികളായ ജപ്പാനും തമ്മില്‍ ഏറ്റുമുട്ടും. അതിഥികളായി എത്തിയ ജപ്പാന്റെ കോപാ അമേരിക്കയിലെ അരങ്ങേറ്റം കൂടിയാണ് ഇന്നത്തേത്. ടൂര്‍ണമെന്റില്‍ ചിലിയുടെയും ആദ്യത്തെ മത്സരമാണ് ഇന്നത്തേത്. 2015, 2016 വര്‍ഷങ്ങളില്‍ യുവാന്‍ പിസ്സിയുടെ കീഴിലായിരുന്നു ചിലി കോപാ കിരീടം സ്വന്തമാക്കിയത്. എന്നാല്‍ 2018 ലോകകപ്പില്‍ നിറം മങ്ങിയ പ്രകടനം പുറത്തെടുത്തതിന് ശേഷം പരിശീലകനെ പുറത്താക്കിയിരുന്നു. പകരക്കാരനായി റെയ്‌നാല്‍ദോ റുവേദയേയാണ് പരിശീലകനായി നിയമിച്ചിട്ടുള്ളത്. റുവേദക്ക് കീഴില്‍ ചിലി കോപാ കിരീടം നിലനിര്‍ത്താനുള്ള പോരാട്ടത്തിനാണ് ഇന്ന് തുടക്കം കുറിക്കുന്നത്. അതേ സമയം ചിലിയെ തകര്‍ക്കാന്‍ കെല്‍പ്പുള്ള ടീമാണ് ജപ്പാന്‍. കാരണം കഴിഞ്ഞ ലോകകപ്പില്‍ മികച്ച പ്രകടനം കാഴ്ചവച്ച് ഏഷ്യന്‍ ഫുട്‌ബോളിന്റെ മനം നിറച്ചായിരുന്നു ജപ്പാന്‍ മടങ്ങിയത്. ലോക ഒന്നാം നമ്പറുകാരായ ബല്‍ജിയത്തെ വിറപ്പിക്കാനും ജപ്പാന് കഴിഞ്ഞു. ഏഷ്യന്‍ കപ്പ് ഫൈനലില്‍ ഖത്തറിനോട് പരാജയപ്പെട്ടെങ്കിലും മികച്ച പ്രകടനമായിരുന്നു ടൂര്‍ണമെന്റിലുടനീളം കാഴ്ച വച്ചത്. ഇരു ടീമുകളും തുല്യ ശക്തികളായതിനാല്‍ ഇന്ന് കോപ്പയില്‍ മികച്ചൊരു പോരാട്ടം പ്രതീക്ഷിക്കാം. പുലര്‍ച്ചെ 4.30നാണ് മത്സരം.