സോവോപോളോ: കോപ അമേരിക്കയില്‍ ഗ്രൂപ്പ് തലത്തിലെ ആദ്യ മത്സരത്തില്‍ മെസ്സിയേയും സംഘത്തേയും ഞെട്ടിച്ച് കൊളംബിയന്‍ പട. ഇന്നലെ നടന്ന മത്സരത്തിലാണ് കൊളംബിയ എതിരില്ലാത്ത രണ്ട് ഗോളുകള്‍ക്ക് അര്‍ജന്റീനയെ തകര്‍ത്തത്. 71-ാം മിനുട്ടില്‍ റോജര്‍ മാര്‍ട്ടിനസ്, 86-ാം മിനുട്ടില്‍ ഡുവാന്‍ സപാറ്റ എന്നിവരാണ് കൊളംബിയക്ക് വേണ്ടി ഗോളുകള്‍ സ്വന്തമാക്കിയത്. കളിയിലെ കണക്കുകളില്‍ അര്‍ജന്റീനക്കായിരുന്നു മുന്‍തൂക്കം.

പക്ഷെ നിര്‍ണായക നീക്കങ്ങളില്‍ കൊളംബിയന്‍ മുന്നേറ്റനിരയെ തടുക്കാന്‍ അര്‍ജന്റീനക്ക് കഴിയാതെ പോയതായിരുന്നു ഗോളില്‍ കലാശിച്ചത്. അര്‍ജന്റീനന്‍ പ്രതിരോധത്തിന്റെ ആലസ്യത്തില്‍ നിന്ന് പിറന്നതായിരുന്നു കൊളംബിയയുടെ രണ്ട് ഗോളുകളും.

ആദ്യ പകുതിയില്‍ മെസ്സി കാഴ്ചക്കാരനായപ്പോള്‍ കൊളംബിയന്‍ ബോക്‌സിലേക്ക് പന്തെത്തിക്കാന്‍ പോലും അര്‍ജന്റീനയ്ക്കായില്ല. ര@ണ്ടാം പകുതിയില്‍ അര്‍ജന്റീന താളംകണ്ടെണ്ടത്തിയപ്പോഴേയ്ക്കും കൊളംബിയയുടെ ആദ്യഗോളെത്തി. ജെയിംസ് റോഡ്രിഗസ് ബോക്‌സിന്റെ ഇടതുഭാഗത്ത് നിന്ന് തൊടുത്ത ഷോട്ട് റോജര്‍ മാര്‍ട്ടിനസാണ് ലക്ഷ്യത്തിലെത്തിച്ചത്. കൊളംബിയന്‍ പ്രതിരോധം വരിഞ്ഞ് കെട്ടിയ മെസ്സിക്ക് കാര്യമായ നീക്കങ്ങള്‍ നടത്താന്‍ സാധിച്ചില്ല. ആദ്യ മത്സരത്തില്‍ പരാജയപ്പെട്ടതോടെ ഗ്രൂപ്പില്‍ ബാക്കിയുള്ള രണ്ട് മത്സരങ്ങളും അര്‍ജന്റീനക്ക് സമ്മര്‍ദത്തിന്റേതാകും. പരഗ്വായ്, ഖത്തര്‍ എന്നീ ടീമുകള്‍ക്കെതിരേയാണ് അടുത്ത രണ്ട് മത്സരങ്ങള്‍.