റിയാദ്: ഇന്ത്യയടക്കം വിവിധ രാജ്യങ്ങളില്‍ നിന്നുള്ള ഗാര്‍ഹിക തൊഴിലാളികളെ റിക്രൂട്ട് ചെയ്യാന്‍ ഇ-വിസ സമ്പ്രദായം നിലവില്‍ വന്നു. ഇന്ത്യയെ കൂടാതെ പാകിസ്താന്‍, ബംഗ്ലാദേശ്, ഫിലിപ്പൈന്‍സ്, വിയറ്റ്‌നാം, ശ്രീലങ്ക, കംബോഡിയ തുടങ്ങിയ പതിനൊന്നു രാജ്യങ്ങളില്‍ നിന്നുള്ള ഗാര്‍ഹിക തൊഴിലാളികളെ റിക്രൂട്ട് ചെയ്യുന്നതിനാണു പുതിയ സംവിധാനം നടപ്പിലാക്കിയത്.

സ്വദേശികള്‍ക്ക് നേരിട്ട് റിക്രൂട്ട് ചെയ്യാന്‍ സാധിക്കുന്ന മുസാനിദ് പോര്‍ട്ടല്‍ വഴി ഇ-വിസകള്‍ അനുവദിക്കുന്നതായി തൊഴില്‍, സാമൂഹിക വികസന മന്ത്രാലയ വക്താവ് ഖാലിദ് അബല്‍ഖൈല്‍ അറിയിച്ചു. ആറു ലക്ഷം സഊദികള്‍ മുസാനിദ് പോര്‍ട്ടലില്‍ രജിസ്റ്റര്‍ ചെയ്തിട്ടുണ്ട്. ഇവര്‍ക്ക് റിക്രൂട്ട്‌മെന്റ് ഓഫിസുകളെ സമീപിക്കാതെ പോര്‍ട്ടല്‍ വഴി നേരിട്ട് ഇ-വിസകള്‍ നേടുന്നതിന് സാധിക്കും. മറ്റു രാജ്യങ്ങളില്‍ നിന്നും ഗാര്‍ഹിക തൊഴിലാളികളെ റിക്രൂട്ട് ചെയ്യുന്നതിന് ഇ-വിസ അനുവദിക്കുന്നതിനും തൊഴില്‍, സാമൂഹിക വികസന മന്ത്രാലയം ശ്രമിച്ചുവരികയാണെന്നും മന്ത്രാലയ വക്താവ് പറഞ്ഞു.