റിയാദ്: ജീവിതം കര കയറ്റാന്‍ സഊദിയിലേക്ക് വിമാനം കയറിയ പ്രവാസി തിരിച്ചു പോകുന്നത് നീണ്ട മുപ്പത്തിനാല് വര്‍ഷങ്ങള്‍ക്ക് ശേഷം. കൊല്ലം അഞ്ചല്‍ സ്വദേശി അബ്ദുല്‍ റഷീദിനാണ് ഒടുവില്‍ പൊതുമാപ്പിന്റെ ആനുകൂല്യത്തില്‍ നാട്ടിലേക്ക് പോകാന്‍ വഴിയൊരുങ്ങിയത്. 1983 ല്‍ സഊദിയിലെത്തിയ ഇദ്ദേഹം വിവിധ പ്രതിസന്ധികളെ തുടര്‍ന്നാണ് ജീവിതത്തിനെ ഏറിയ പങ്കും ഇവിടെ കഴിയാന്‍ കാരണം.

22 ാമത്തെ വയസ്സില്‍ സഊദിയിലെത്തിയ ഇദ്ദേഹം കെട്ടിട നിര്‍മ്മാണ സ്ഥലത്തെ കാവല്‍ക്കാരനായിട്ടാണ് ജോലി ആരംഭിച്ചത്. ആദ്യ ആറു വര്‍ഷം വലിയ കുഴപ്പമൊന്നുമില്ലാതെ ഇവിടെ ജോലി ചെയ്തു. തുടര്‍ന്ന് ഭാഷകളും സഊദിയിലെ ജീവിത രീതികളും മനസ്സിലാക്കി കച്ചവട മേഖലയിലേക്കു തന്റെ പ്രവാസം മെല്ലെ നീക്കിവെച്ചു. പക്ഷെ, ഇവിടെ നിരാശയായിരുന്നു ഫലം. ഒന്നും രണ്ടും മൂന്നുമല്ല, നിരവധി കച്ച വട സ്ഥാപനങ്ങള്‍ നടത്തിയെങ്കിലും എല്ലാം നഷ്ടത്തിലായിരുന്നു കലാശിച്ചത്. ഇതിനിടയില്‍ ഇഖാമയും തീര്‍ന്നത് ജീവിതം കൂടുതല്‍ ദുരിത പൂര്‍ണ്ണമാക്കി.

ഏറ്റവും ഒടുവിലായി 1994 ലാണ് താമസ രേഖ പുതുക്കിയത്. ഇതിനിടെ പാസ്‌പോര്‍ട്ട്് അടക്കമുള്ള രേഖകള്‍ റിയാദ് ബത്ഹയിലുണ്ടായ തീപിടുത്തില്‍ കത്തി നശിച്ചതും സ്‌പോണ്‍സറും മരണവും നാട്ടില്‍ പോകാനുള്ള യാത്രകള്‍ക്ക് വിഘാതമാകുകയും ചെയ്തു . ദുരിത ജീവിതത്തിന്റെ 34 വര്‍ഷത്തിനൊടുവില്‍ നാടുകടത്തല്‍ കേന്ദ്രത്തില്‍ നിന്ന് നോര്‍ക്ക കണ്‍സള്‍ട്ടന്റ് ഷിഹാബ് കൊട്ടുകാടിന്റെ സഹായത്തോടെയാണ് ഫൈനല്‍ എക്‌സിറ്റ് നേടിയത്. ഇനിയുള്ള കാലം നാട്ടില്‍ തൊഴിലെടുത്ത് ഉമ്മയോടൊപ്പം കഴിയാമെന്ന പ്രതീക്ഷയിലാണ് റഷീദ്.