ഗസ്സ: ദക്ഷിണ ഗസ്സ മുനമ്പില്‍ ഇസ്‌റാഈല്‍ വ്യോമാക്രണത്തില്‍ രണ്ടു ഫലസ്തീനികള്‍ കൊല്ലപ്പെട്ടു. ഇബ്രാഹിം അല്‍ നജ്ജാര്‍, മുഹമ്മദ് ഖിദര്‍ എന്നിവരാണ് കൊല്ലപ്പെട്ടത്.

അതിര്‍ത്തിയിലെ മതിലിന്റെയടുത്ത് 'തീവ്രവാദീ' സാന്നിധ്യമുണ്ടായെന്നും ഇവരെ ലക്ഷ്യമിട്ടാണ് ആക്രമണമെന്നും ഇസ്‌റാഈല്‍ പറഞ്ഞു. മതിലിനടുത്ത് എന്തോ സ്ഥാപിക്കാന്‍ ശ്രമിച്ചെന്നും ഇസ്‌റാഈല്‍ ആരോപിച്ചു.

അതേസമയം, തിങ്കളാഴ്ചയുണ്ടായ പ്രതിഷേധ മാര്‍ച്ചിനു നേരെയും ഇസ്‌റാഈല്‍ ആക്രമണമുണ്ടായി. 26 ഫലസ്തീനികള്‍ക്കാണ് വെടിയേറ്റു പരുക്കേറ്റത്.

കഴിഞ്ഞ മാര്‍ച്ച് മുതല്‍ ഫലസ്തീനികള്‍ ഇസ്‌റാഈലിനെതിരെ ശക്തമായി പ്രതിഷേധിക്കുകയാണ്. 11 വര്‍ഷം നീണ്ട ഇസ്‌റാഈല്‍ ഉപരോധനം നീക്കണമെന്നും മടങ്ങാനുള്ള അവകാശം അനുവദിക്കണമെന്നും ആവശ്യപ്പെട്ടാണ് പ്രതിഷേധം നടക്കുന്നത്. ഓരോ വെള്ളിയാഴ്ചകളിലും നടത്തിയിരുന്ന 'ഗ്രേറ്റ് മാര്‍ച്ച് ഓഫ് റിട്ടേണി'നു നേരെയുണ്ടായ ഇസ്‌റാഈല്‍ ആക്രമണത്തില്‍ ഇതുവരെ 170 ഫലസ്തീനികള്‍ കൊല്ലപ്പെടുകയും 18,000 ത്തില്‍ അധികം പേര്‍ക്ക് പരുക്കേല്‍ക്കുകയും ചെയ്തു.