ചെര്‍പ്പുളശ്ശേരി: ഷൊര്‍ണൂര്‍ എം.എല്‍.എ പി.കെ.ശശി രാജിവക്കണമെന്നാവശ്യപ്പെട്ടു കെ.എസ്.യു.ജില്ലാ കമ്മറ്റിയുടെ നേതൃത്വത്തില്‍ ചെര്‍പ്പുളശ്ശേരിയിലെ എം.എല്‍.എ ഓഫിസിലേക്കു നടത്തിയ മാര്‍ച്ചില്‍ സംഘര്‍ഷം .പൊലിസ് ലാത്തിവീശിയതിനെ തുടര്‍ന്ന് സംസ്ഥാന പ്രസിഡന്റ് കെ.എം. അഭിജിത്തടക്കം നിരവധി പേര്‍ക്ക് പരുക്കേറ്റു.

പൊലിസിനും പരുക്കേറ്റിട്ടുണ്ട്. വിദ്യാര്‍ത്ഥി പ്രകടനം എം.എല്‍.എ ഓഫിസിനടുത്തു വച്ച് പൊലിസ് തടഞ്ഞിരുന്നു. ബാരിക്കേടര്‍ തകര്‍ത്ത് മുന്നേറാന്‍ ശ്രമിച്ച കെ. എസ് .യു പ്രവര്‍ത്തകരും പൊലിസും ഏറ്റുമുട്ടി. തുടര്‍ന്ന് പൊലിസ് ലാത്തി വീശുകയായിരുന്നു.

ജില്ലാ പ്രസിഡന്റ് കെ.എസ്.ജയഘോഷ്, ജില്ലാ ജനറല്‍ സെക്രട്ടറി പി.ടി. അജ്മല്‍, ഷാഫി കാരക്കാട് ,സിറാജ് തെക്കത്ത് എന്നിവര്‍ക്കും പരുക്കുണ്ട്. ഇവരെ ചെര്‍പ്പുളശ്ശേരി ഗവ: ആശുപത്രിയില്‍ പ്രവേശിപ്പിച്ചു. പരുക്കേറ്റ ശ്രീകൃഷ്ണപുരം സബ് ഇന്‍സ്‌പെക്ടര്‍ ശ്രീനിവാസന്‍, ചെര്‍പ്പുളശ്ശേരി എസ്.ഐ.രാജേഷ്, സിവില്‍ പൊലിസ് ഓഫിസര്‍ രാജന്‍ എന്നിവരും ചികിത്സ തേടി.

യാതൊരു പ്രകോപനവുമില്ലാതെയാണ് പൊലിസ് മര്‍ദ്ദിച്ചതെന്ന് കെ.സ്.യു.സംസ്ഥാന പ്രസിഡന്റ് അഭിജിത്ത് പറഞ്ഞു. എന്നാല്‍ മാര്‍ച്ച്അവസാനിച്ച ശേഷം പ്രവര്‍ത്തകര്‍ പൊലിസിനെ കല്ലെറിഞ്ഞതാണ് കാരണമെന്നും തുടര്‍ന്ന് പ്രവര്‍ത്തകരെ വിരട്ടി ഓടിക്കുകയാണ് ചെയ്തതെന്നും കണ്ടാലറിയാവുന്നവര്‍ക്കെതിരെ കേസെടുക്കുമെന്നും പൊലിസ് പറഞ്ഞു. പാലക്കാട് ജില്ലയില്‍ നാളെ കെ.എസ്.യു വിദ്യഭ്യാസ ബന്ദിന് ആഹ്വാനം ചെയ്തു.