ശാസ്താംകോട്ട: മൊബൈല്‍ ഫോണ്‍ വില്‍പനകേന്ദ്രത്തില്‍ നിന്നും വിലപിടിപ്പുള്ള നിരവധി ഫോണുകള്‍ കവര്‍ന്ന രണ്ടു യുവാക്കള്‍ പിടിയില്‍. മലപ്പുറം താനൂര്‍ ജമാല്‍ പീടിക താനൂര്‍ അങ്ങാടിയില്‍ മുഹമ്മദ് റാഫി, സുഹൃത്ത് താനൂര്‍ കടപ്പുറം ദേശി ഹര്‍ഷാദ് എന്നിവരാണ് അറസ്റ്റിലായത്.
പള്ളിശേരിക്കല്‍ തെങ്ങുംതറയില്‍ ഉമര്‍ മുക്താറിന്റെയും മനക്കര ഷാജി നിവാസില്‍ ഷമീറിന്റെയും ഉടമസ്ഥതയില്‍ ശാസ്താംകോട്ട ഫില്‍റ്റര്‍ ഹൗസിനു സമീപം പ്രവര്‍ത്തിക്കുന്ന എസ്.എം മൊബൈല്‍സില്‍ കഴിഞ്ഞ ജനുവരി 20 ന് അര്‍ധരാത്രിയാണ് മോഷണം നടന്നത്.
വിവിധ കമ്പനികളുടെ 22 ഓളം മൊബൈല്‍ ഫോണുകളും ഒരു സോഫ്റ്റ്‌വെയര്‍ ബോക്‌സുമാണ് പ്രതികള്‍ മോഷ്ടിച്ചത്.
 ഒന്നാം പ്രതിയായ മുഹമ്മദ് റാഫി കഴിഞ്ഞ ആറു മാസക്കാലമായി കടയില്‍ ടെക്‌നീഷ്യനായി ജോലി നോക്കി വരികയായിരുന്നു.
മോഷണം നടന്ന ശേഷം ഇയാള്‍ സ്വദേശത്തേക്ക് കടന്നിരുന്നു. തുടര്‍ന്ന് ഇയാളെ ചുറ്റിപ്പറ്റി നടത്തിയ അന്വേഷണത്തില്‍ മോഷണം പോയ ഫോണുകളില്‍ ചിലത് താനൂരും മറ്റും ഉപയോഗിക്കുന്നതായി കണ്ടെത്തി.
പിന്നീട് നടത്തിയ അന്വേഷണത്തിനൊടുവിലാണ് പ്രതികള്‍ വലയിലായത്. കോടതിയില്‍ ഹാജരാക്കിയ  പ്രതികളെ റിമാന്റ് ചെയ്തു.