കോയമ്പത്തൂര്‍: തമിഴ്‌നാട് പൊലിസിലെ പ്രത്യേക അന്വേഷണ സംഘം നടത്തിയ തിരച്ചിലില്‍ ഇന്നലെ ഐ.എസ് അനുഭാവികളായ മൂന്നുപേര്‍ അറസ്റ്റിലായി. ആരാധനാലയങ്ങള്‍, ജനിബിഡമായ മറ്റിടങ്ങള്‍ കേന്ദ്രീകരിച്ച് സ്‌ഫോടനം നടത്തി ജനങ്ങളില്‍ ഭീതിയുണ്ടാക്കാനുള്ള ശ്രമത്തിലായിരുന്നു ഇവരെന്ന് പൊലിസ് അറിയിച്ചു.
മുഹമ്മദ് ഹുസൈന്‍, ഷാജഹാന്‍, ഷെയ്ക്ക് സെയ്ഫുള്ള എന്നിവരെയാണ് അറസ്റ്റ് ചെയ്തതെന്ന് പൊലിസ് അറിയിച്ചു. ഐ.എസിന്റെ ആത്മഹത്യാ സ്‌ക്വാഡിലെ അംഗങ്ങളാണ് ഇവരെന്നും കണ്ടെത്തിയിട്ടുണ്ട്.
ഐ.എസിന്റെ ആശയങ്ങളില്‍ ആകൃഷ്ടരായ ഇവര്‍, തമിഴിലേക്ക് മൊഴിമാറ്റി ജനങ്ങള്‍ക്കിടയില്‍ എത്തിക്കുന്നതിനായി ശ്രമിച്ചുവരികയായിരുന്നു. ശ്രീലങ്കയില്‍ നടന്ന സ്‌ഫോടനത്തിന് പിന്നില്‍ പ്രവര്‍ത്തിച്ച സഹ്‌റാന്‍ ഹാഷിമിന് ഇവര്‍ പിന്തുണ പ്രഖ്യാപിച്ചിരുന്നുവെന്നും പൊലിസ് പറയുന്നു.